काठमाडौं– नेपाली जनसम्पर्क समिति नर्वेको पाँचौँ अधिवेशन सम्पन्न भएको छ । अधिवेशनले पारस मणि मिश्रलाई अध्यक्षमा निर्वाचित गरेको छ । मिश्रले २८३ मत प्राप्त गर्दै विजयी हुँदा उनका प्रतिस्पर्धी शालिग्राम अर्यालले १८६ मत प्राप्त गरेका थिए ।

कुल ४४४ भौतिक र ३५ अनलाइन गरी ४७९ मत खसेकोमा १० मत बदर भएका थिए । उपाध्यक्ष पदमा गणेश थापा, चक्र विक्रम शाही, रमेश घिमिरे र गिरीराज अधिकारी निर्वाचित भएका छन् ।

निर्विरोध निर्वाचित पदाधिकारीहरूमा वरिष्ठ उपाध्यक्षमा पूर्ण बहादुर शाही, महासचिवमा सुरेश कुमार यादव र रमेश सुवेदी, सहमहासचिवमा नरेश बास्कोटा, विनोद श्रेष्ठ, कृष्ण बहादुर खत्री तथा कोषाध्यक्षमा निर्मला परियार रहेका छन्। सदस्यहरूमा नवराज श्रेष्ठ, रमेश तिम्सिना, राघव चन्द्र अधिकारी, विष्णु पौडेल, नवीन सापकोटा र घनश्याम तिवारी निर्वाचित भएका छन् ।

कार्यक्रमको अध्यक्षता समितिका तत्कालीन अध्यक्ष जितेन्द्र विक्रम शाहीले गरेका थिए । प्रमुख अतिथिका रूपमा नेपाली कांग्रेसका केन्द्रीय प्रतिनिधि तथा जनसम्पर्क समिति भारतका सभापति बालकृष्ण पाण्डे सहभागी थिए । नेपाली कांग्रेसले निर्वाचन अधिकृतको जिम्मेवारी नवीन थपलियालाई दिएको थियो ।

प्रमुख अतिथि पाण्डेले विदेशमा रहेका नेपालीहरूको सीप, पुँजी र नेटवर्कको सदुपयोग गर्दै नेपालमा रोजगारी सिर्जना र समृद्धि ल्याउन सकिने बताउँदै, पर्यटन प्रवर्द्धनका लागि प्रवासी नेपालीहरूले आ-आफ्नो ठाउँबाट पहल गर्नुपर्नेमा जोड दिए । अधिवेशनलाई नमूना सभाका रूपमा चित्रण गर्दै उनले अनुशासन र समावेशिताको प्रशंसा गरेका थिए ।

निर्वाचन अधिकृत थपलियाले निष्पक्ष, समावेशी र पारदर्शी निर्वाचनका लागि सबैलाई बधाई दिँदै, यस पटकको निर्वाचन धेरै सहभागीहरूको लागि पहिलो अनुभव भएको र लोकतान्त्रिक प्रक्रियाको अभ्यासमा उनीहरूले नयाँ अनुभव लिएको बताए ।