काठमाडौं- प्रमुख सत्तारूढ दल नेकपा एमालेका नेता गोकुल बास्कोटाले नेपालमा राजसंस्था फर्किने सम्भावना नरहेको बताएका छन् ।

आइतबार बसेको प्रतिनिधि सभाको बैठकमा बोल्ने क्रममा उनले नेपालमा मरिसकेको राजसंस्था बौरिने कुनै सम्भावना नभएको बताएका हुन् ।

‘राजा ल्याउने भनेर एकथरी कराउने, अर्काथरी संघर्ष चर्काउने भनेर कराइरहेका छन् । प्रतिशोध भयो भनेर अर्कोथरी सुरुदेखि नै कराउँदैछन् । ठीकै छ, यो कराउने ठाउँ नै हो, पाइन्छ कराउन’, उनले भने, ‘सरकार मन नपर्न सक्छ, के प्रमुख प्रतिपक्ष (माओ‌वादी केन्द्र) ले लोकतन्त्रको विकल्प खोजेको हो ? दक्षिणपन्थी विचार र वामपन्थी विचार बोक्नेको एउटै चुल्हो बलेको हो ? सहमति त्यसमै हो ? याद गर्नु होला, त्यो चुल्होमा गणतन्त्र मास्ने, राजतन्त्र फर्काउने खिचडी एक पाक्दैन, दुई पाक्दैन, तीन पाक्दैन । सम्भव छैन । यो २१औं शताब्दी हो, के गर्न राजा फर्काउने ?’

पूर्वसूचना तथा सञ्चारमन्त्री बास्कोटाले राजा फर्काउछु भन्दै आन्दोलन गर्नेलाई त्याग्न आग्रह गरेका छन् । पोखरामा रहेका पूर्वराजा ज्ञानेन्द्र शाहलक्षित राप्रपाको आन्दोलनप्रति इंगित गर्दै बास्कोटाले कटाक्ष गरे । उनले पोखरामा रहेका पूर्वराजालाई काठमाडौंमा आउन कुनै आन्दोलन गर्नु नपर्ने बताए । जहाजको टिकट काटिदिएमा पूर्वराजा आफैँ काठमाडौं आउने टिप्पणी उनले गरे ।

‘यो २१ औँ शताब्दी हो, के गर्न राजा फर्काउने ? केका लागि राजतन्त्र फर्काउने ? के पाइन्छ ? राजा फर्काउन पोखरामा जुलुस गर्न पर्छ ?,’ उनले भने, ‘धेरै गर्नु पर्दैन, जहाजको एउटा टिकट काट्दिनुस्, पूर्वराजा जुलुस नगरी काठमाडौं फर्किहाल्छन् । केलाई दु:ख गर्ने ? फर्किने भनेको काठमाडौं त होला । सिंहासनमा त सम्भव छैन, सम्भव छँदै छैन ।’