काठमाडौं – वेस्ट इन्डिजले बंगलादेशविरुद्धको एकदिवसीय श्रृङ्खलामा नयाँ इतिहास रचेको छ ।उक्त श्रृङ्खलाको दोस्रो खेलमा वेस्ट इन्डिजले पूरा ५० ओभर स्पिन बलरहरूमात्र प्रयोग गरी अनौठो कीर्तिमान बनाएको हो ।

बंगलादेशविरुद्ध खेलेको उक्त म्याचमा एकपटक पनि तीव्र गतिका बलरहरूलाई प्रयोग नगरी कप्तान साई होपले सम्पूर्ण ओभर स्पिनरहरूको जिम्मा दिएका थिए । उक्त निर्णयले क्रिकेटमा नयाँ रणनीतिक युगको संकेत गरेको बताइएको छ ।

खेलमा वेस्ट इन्डिजका स्पिन बलरहरू प्रभावशाली बने । बाँया हाते स्पिनर गुडाकेश मोटीले १० ओभरमा ३ विकेट लिँदै ६५ रन खर्चिए भने अर्का स्पिनर अकील होसैनले पनि निरन्तर दबाब सिर्जना गरे । अलिक अथानाजेले समेत १० ओभरमा मात्र १४ रन दिएर २ विकेट लिन सफल भए । ती सबैको संयुक्त प्रदर्शनका कारण बंगलादेशको टोली २१३ रनमै सीमित भयो ।

खेलपछि कप्तान साई होपले पिच स्पिन बलिङको अनुकूल देखिएकाले पूरा खेल स्पिनरबाटै गराउने निर्णय लिएको बताए । उनका अनुसार तीव्र बलरको साटो स्पिनरहरूलाई प्राथमिकता दिँदा टिमको योजनाअनुसार सफलता हात परेको हो ।

यो म्याचसँगै वेस्ट इन्डिज एकदिवसीय क्रिकेटमा पूरा ५० ओभर स्पिनरमार्फत बलिङ गर्ने पहिलो टोली बनेको छ । यसअघि कुनै पनि टोलीले यस्तो जोखिमपूर्ण तर सफल प्रयोग गरेको थिएन ।

विश्लेषकहरूका अनुसार वेस्ट इन्डिजको यो निर्णयले भविष्यमा अन्य टोलीहरूलाई पनि सोच्न बाध्य बनाउनेछ । पिच र अवस्थाअनुसार स्पिन बलिङलाई प्राथमिकता दिने प्रवृत्ति अब नयाँ युगमा प्रवेश गर्ने सम्भावना रहेको उनीहरूको मत छ ।

क्रिकेट इतिहासमा यो म्याच स्पिन बलरहरूको क्षमता र रणनीतिक प्रयोगको उत्कृष्ट उदाहरणका रूपमा याद गरिने निश्चित देखिन्छ ।