सुर्खेत – नेपाल प्रहरीले सुर्खेतमा नेटवर्किङ माध्यमबाट ठगी गर्ने गिरोहलाई नै पक्राउ गरेको छ । बेरोजगार युवाहरूलाई रोजगारी दिने भन्दै ठगी गरेको आरोपमा प्रहरीले पक्राउ गरेको हो ।

सुर्खेत वीरेन्द्रनगर नगरपालिका—३, मुलपानी चोकमा रहेको स्काई ड्रिम ईन्टरपेनर्स प्रालिमार्फत ग्लोबल ओरियन्स नेपाल प्रालिमा विभिन्न जिल्लाका बेरोजगार युवायूवतीलाई सीप सिकाइ राम्रो तलब सुबिधासहित रोजगारी दिलाउने नेटवर्किङ मार्केटिङ चलाएर ठगी गरेको आरोपमा आठ जना पक्राउ गरेको जिल्ला प्रहरी कार्यालय सुर्खेतका प्रहरी प्रवक्ता एवं सूचना अधिकारी मोहनजंग बुढथापाले जानकारी दिए ।

उनीहरूले भाडाको कोठाबाट नेटवर्किङ मार्केटिङ गरेर विभिन्न प्रलोभनमा पारी आफू मातहत नेटवर्कमा नयाँ सदस्यलाइ आबद्ध गराइ प्रति व्यक्ति पाँच हजारदेखि दुई लाख ६० हजार रुपैयाँसम्म रकम जम्मा गर्न लगाएको खुलेको छ । उक्त गिरोहले ठगी गरेको उजुरी प्रहरीमा परेको थियो ।

पक्राउ पर्नेमा डोटी जिल्ला सायल गाउँपालिका—२ घर भई स्काई ड्रिम ईन्टरपेनर्स प्रालिका सञ्चालक २६ वर्षीया नरेश बोहोरा, दार्चुला जिल्ला महाकाली गाउँपालिका—४ घर भई उक्त प्रालिका व्यवस्थापक/कर्मचारी २४ वर्षीया कृष्ण धामी, अछाम जिल्ला कमल बजार नगरपालिका—६ घर भई उक्त प्रालिका व्यवस्थापक/कर्मचारी बर्ष २४ वर्षीया कमल शाही, अछाम कमल बजार नगरपालिका—६ घर भएका २२ वर्षीया रबिन्द्र शाही, कन्चनपुर जिल्ला महाकाली नगरपालिका—२ घर भएका २२ वर्षीया मनिषा सिंह, कन्चनपुर बेल्डाडी गाउँपालिका—१ घर भई उक्त प्रालिका कर्मचारी २१ वर्षीया निर्मला धामी, बैतडी सिगास गाउँपालिका—६ घर भई उक्त प्रालिको कर्मचारी २२ वर्षीया सुनिता साउद र डोटी जिल्ला बडिकेदार गाउँपालिका—४ घर भएका २२ वर्षीया कमला चिमाला रहेको प्रहरीले जनाएको छ ।

घटनाका बिषयमा उनीहरुलाई थुनामा राखेर अनुसन्धान भइरहेको प्रहरीले जनाएको छ ।