काठमाडौं– मनसुनको समयमा पनि पर्याप्त पानी नपर्दा काठमाडौं उपत्यकामा गर्मी महसुस भएको छ । मानिसहरू गर्मीबाट बच्न छाता ओढेर हिँडिरहेका अथवा शीतल तापिरहेका देखिन्छन् ।

काठमाडौं उपत्यकामा केही समययता मौसमको प्रवृत्तिमा परिवर्तन आइरहेको छ । केही बेरमा पानी पर्ने अनि एक छिनमा झलमल्ल घाम लाग्ने, एक ठाउँ दर्के पानी ओइरिने अलि पर सुक्खा हुने भइरहेको छ । पानी नपर्दा हुप्प गर्मी हुने तर पानी परेपछि हल्का जाडो हुने काठमाडौंको मौसम छ ।

पानी पर्‍यो भनेर रेनकोट ओढेर हिँड्यो केही किलोमिटर पर पानी परेकै हुँदैन । यस्तो अनुभव धेरैपल्ट तपाई हामीले गरेका छौँ । अलि ठूलो वर्षा भएपछि सडकमा पानी जम्ने र त्यो सुकेपछि धुलो उडेर हैरानी हुने गरेको छ ।

जलवायु परिवर्तनका कारण मौसमी प्रवृत्ति फेरिएको जानकारहरू बताउँछन् । तर यसबारे पर्याप्त अध्ययन भने भएको छैन ।

त्यसो त यस वर्ष मनसुन उत्कर्षमा पुग्दा पनि पर्याप्त वर्षा भएको छैन । जल तथा मौसम विज्ञान विभागले केही दिनअघि भारी वर्षा हुने पूर्वानुमान गरेको थियो । तर मधेशमा पानी नपरेर धान रोपाइँ भएको छैन ।

तस्बिरहरू : नेपाल फोटो लाइब्रेरी