काठमाडौं – नयाँ प्रदर्शन मिति तोक्दै फिल्म ‘रिमै’को टिजर सार्वजनिक भएको छ । पहिला भदौ २७ गते प्रदर्शन मिति तोकिएको यो फिल्म अब भदौ २० बाट हलमा लाग्ने भएको छ ।

भदौ २० मा प्रदर्शनमा आउँदा यस फिल्मले हाँस्य कलाकार खड्कबहादुर पुन शीर्ष भूमिकामा रहेको ‘चिठ्ठी’सँग बक्स अफिस प्रतिस्पर्धा गर्ने पक्का भएको हो ।

‘रिमै’को टिजर दयाहाङ राई विवाहका लागि केटी माग्न गएको दृश्यबाट सुरु हुन्छ । उनले फिल्ममा आशबहादुर गुरुङको भूमिका निर्वाह गरेको टिजरले प्रष्ट पार्छ ।

टिजरमा ‘कबड्डी जोडी’ दयाहाङ र रिश्मा गुरुङ (काजी र मैया)लाई प्रेम जोडीका रुपमा प्रस्तुत गरिएको छ । अर्पण थापाको भूमिका भने रहस्यमयी छ । उनी धोका खाएको प्रेमीको भूमिकामा रहेको टिजरले खुलाउँछ ।

गुरुङ समुदायको प्रेम, विवाह र वियोगको कथामा फिल्म बनेको टिजरले संकेत गर्छ ।

गोरखा सिरानचोक एन्ड लिगलिगकोट फिल्म्स् प्रालीको प्रस्तुती र रोटेपिङ इन्टरटेनमेन्टको सहकार्यमा निर्माण भएको यस फिल्ममा उनीहरुसहित कविता आले मगर, माओत्से गुरुङ, पुस्कर गुरुङ लगायत छन् ।

उपेन्द्र सुब्बाको लेखन रहेको यस फिल्मलाई शैलेन्द्र ध्वज कार्कीले खिचेका हुन् । निर्माताहरु टीका गुरुङ, जिता यात्री गुरुङ र दुनबहादुर घले हुन् । निर्देशक खिलबहादुर गुरुङ हुन् ।