काठमाडौं– काठमाडौं महानगरपालिका– ५ ज्ञानेश्वर नजिकै रहेको सानो गौचरन फुटबल मैदान व्यवस्थित खेल मैदानमा रूपान्तरण गरिँदै छ ।

करिब २५ हजार दर्शक अट्ने क्षमताको आधुनिक खेल मैदान निर्माणका लागि अहिले धमाधम काम भइरहेको छ ।

करिब १८ रोपनी क्षेत्रफलमा बन्न लागेको खेल मैदान २०८१ मंसिर १३ गते काठमाडौं महानगरपालिकाकी उपमेयर सुनिता डङ्गोलले शिलान्यास गरेकी थिइन् ।

१८ करोड ८७ लाख रुपैयाँ लागतमा शुभ निर्माण सेवाले निर्माण कार्य गरिरहेको छ । मैदानमा कृत्रिम घाँस, पक्की बार, टिम चेन्जिङ रुम, उपचार कक्ष, शौचालय, पार्किङजस्ता सुविधा समेटिने छन् ।

हालसम्म करिब ५० प्रतिशत निर्माण कार्य सम्पन्न भइसकेको निर्माण कम्पनीले जानकारी दिएको छ । मैदानको लम्बाइ ९६ मिटर र चौडाइ ६२ मिटर हुनेछ । २८ वटा चारपाङ्ग्रे र १७८ वटा दुईपाङ्ग्रे सवारीको लागि पार्किङ स्थान बनाइने छ ।

बेसमेन्टमा महिलाका लागि २३ र पुरुषका लागि १६ वटा शौचालय रहने छन् भने ग्राउण्ड फ्लोरमा चेन्जिङ रुम, फिजियो र फर्स्ट एड कक्ष, खेलाडीका लागि छुट्टाछुट्टै तयारी कोठा निर्माण भइरहेका छन् । साथै नजिकैको ५ रोपनी जमिनमा बास्केटबल, टेबल टेनिस, फुटसल र ब्याडमिन्टन कोर्टसमेत निर्माणको योजना रहेको छ । निर्माण कार्य २०८२ साल चैतभित्र सम्पन्न गर्ने लक्ष्य राखिएको छ।

तस्बिर : नेपाल फोटो लाइब्रेरी