काठमाडौं– काठमाडौँको दरबारमार्गको सडक पेटीमा काठमाडौं महानगरपालिकाले बिछ्याउन लागेको ग्रेनाइट दृष्टिविहीन अपांगतामैत्री नभएको गुनासो आएको छ । 

दृष्टिविहीन अपांगता भएका एक युवक युवराज लामाले ग्रेनाइटमा हिँड्दाको अनुभव सामाजिक सञ्जाल फेसबुकमा साझा (शेयर) गर्दै अपांगतामैत्री नभएको गुनासो गरेका हुन् । 

लामाले महानगर प्रमुख बालेन्द्र शाह (बालेन)लाई सम्बोधन गर्दै ग्रनाइट लगाइएको सडकपेटीमा देष्टिबिहीन अपंगता भएका व्यक्ति हिँड्दा रुमलिने खतरा रहेको उल्लेख गरेका छन् ।  

‘मेरो चासो, सडकपेटीको स्ट्रेन्थ र सौन्दर्यको लागि ग्रेनाइट बिच्छ्याइरहँदा दृष्टिविहीन व्यक्तिहरूका लागि स्ट्रेट डाइरेक्सन पत्ता लगाउन बिच्छ्याइने पहेँलो रङ्गको ट्याक्टाइलको लागि ठाउँ कता हो त ?,’ लामाले प्रश्न गर्दै भनेका छन्, ‘हिँड्दा फराकिलो र चिल्लो महसुस भएता पनि अगाडि स्ट्रेट गाइडलाइन नहुँदा चिल्लो सडक पेटीमै रुमलिने खतरा हुँदो रहेछ मेयरसाब ।’

उनले भनेका छन्, ‘विश्वको अन्य आधुनिकतम सहरहरूमा यसको व्यवस्थापन कसरी गरिरहेको छ भन्नेबारे तपाईं जानकार हुनुहुन्छ होला भन्ने आशा गर्दछु ।’