काठमाडौं- ताइवानी अधिकारकर्मीलाई दमन गरेको भन्दै अमेरिकाले चीनको निन्दा गरेको छ । अमेरिकाको कंग्रेसनल एक्जुकेटिभ कमिसन अन चाइना (सीईसीसी) ले जारी गरेको वार्षिक प्रतिवेदनमा चीनले ताइवानी अधिकारकर्मीमाथि राजनीतिक प्रतिशोध साँधेको आरोप लगाइएको छ ।

प्रतिवेदनमा ताइवानी अधिकारकर्मी याङ ची युआनलाई चीनले राजनीतिक पूर्वाग्रह राखेर बन्दी बनाएको आरोप लगाइएको छ । उनलाई सन् २०२२ को अगस्ट महिनामा झेजियाङ प्रान्तको वेन्झोउ क्षेत्रबाट नियन्त्रणमा लिइएको हो ।

उनले ताइवानी स्वतन्त्रताका लागि गतिविधि गरेको आरोप लगाइएको छ । प्रतिवेदनमा यस्तै अरु धेरै अधिकारकर्मीलाई चीनले बन्धक बनाएको भन्दै उनीहरुको पक्षमा काम गर्न अमेरिकी सांसदहरुलाई आग्रह गरिएको छ ।

ताइपेइ टाइम्सका अनुुसार प्रतिवेदनमा चीनसँग आगामी भेटवार्ता तथा अन्य कूटनीतिक संवादका क्रममा यस्ता मुद्दा उठाउन पनि अधिकारीहरुलाई आग्रह गरिएको छ । टाइम्सका अनुसार अमेरिका चीन सम्बन्ध ऐन २००० अनुसार स्थापित सीईसीसीले चीनमा जारी मानव अधिकार उल्लङ्घनका घटनाबारे निगरानी गर्दै आएको छ ।