काठमाडौं- सुरक्षित एवम् मितव्ययी औषधिको नियमनका लागि भारत र अफ्रिकी मुलुक लाइबेरियाबीच समझदारी भएको छ । यस विषयमा दुबै मुलुकले समझदारीपत्र (एमओयू) मा हस्ताक्षर गरेका छन् ।

भारतीय स्वास्थ्य मन्त्रालयका अनुसार समझदारीपत्रमा हस्ताक्षर भएपछि दुई मुलुकले औषधिमा साझा गुणस्तर मापदण्डलाई प्रोत्साहन गर्ने अपेक्षा गरिएको छ । यस सम्झौतालाई वृहद विश्व स्वास्थ्य साझेदारीसँग पनि जोडेर हेरिएको छ ।

समझदारीपत्रमा लाइबेरियाका स्वास्थ्यमन्त्री लुइज एम क्पोटो र लाइबेरियाका लागि भारतीय राजदूत मनोज विहारी वर्माले हस्ताक्षर गरेका छन् ।

भारतीय आर्थिक अखबार इकोनोमिक टाइम्सका अनुसार यस समझदारीले दुई मुलुकबीच कायम साझेदारीलाई थप मजबुत बनाउने स्वास्थ्य मन्त्रालयको अपेक्षा छ ।

लाइबेरियाको मोनरोभियामा रहेको भारतीय राजदूतावासले सामाजिक सञ्जाल एक्समा पोस्ट गर्दै यस समझदारीपछि लाइबेरियाले भारतीय फार्माकोपियामा आधारित औषधि मापदण्ड स्वीकार गर्ने जनाएको छ ।