काठमाडौं – पूर्वप्रधानमन्त्री झलनाथ खनालकी धर्मपत्नी प्राध्यापक रविलक्ष्मी चित्रकार भारतको नयाँ दिल्लीस्थित एपोलो अस्पतालमा तीन महिना लामो उपचारपछि सोमबार स्वदेश फर्कने भएकी छन् ।

जेन–जी आन्दोलनका क्रममा घरमा भएको आगलागीमा गम्भीर घाइते भई जीवन–मरणको अवस्थाबाट गुज्रिएकी चित्रकारको स्वास्थ्य अवस्था अहिले सुधारोन्मुख भएपछि उनलाई नेपाल फर्काउने निर्णय गरिएको हो ।

भदौ २४ गते बिहान खनाल दम्पती बसोबास गर्ने निवासमा भएको आगलागीमा चित्रकारको शरीरको करिब १५–१७ प्रतिशत भाग जलेको थियो । विशेषगरी देब्रे हातमा गम्भीर चोट लागेपछि संक्रमण फैलिँदै जाँदा अवस्था जटिल बनेको थियो । सुरुमा कीर्तिपुरस्थित बर्न अस्पतालमा उपचार भइरहेको भए पनि फोक्सोमा निमोनियाको संक्रमण बढ्दै गएपछि चिकित्सकको सल्लाहमा उनलाई एयर एम्बुलेन्समार्फत दिल्लीस्थित एपोलो अस्पताल लगिएको थियो ।

एपोलो अस्पतालमा भर्ना भएपछि उनको लामो समय आईसियुमा राखेर उपचार गरिएको थियो । संक्रमण नियन्त्रणमा ल्याउन चिकित्सकहरूले कडा प्रयास गर्नुपरेको र अन्ततः संक्रमण फैलिन नदिन कुमभन्दा मुनिको देब्रे हात शल्यक्रिया गरेर काट्नुपरेको थियो । त्यसपछि क्रमशः अवस्था सुधार हुँदै गएपछि उनलाई आईसियुबाट जनरल वार्डमा सारिएको थियो । पछिल्ला केही सातादेखि उनी अस्पताल बाहिर बसेर नियमित फलोअप र उपचार गराउँदै आएकी थिइन् ।

“उहाँ अझै पनि चिकित्सकीय निगरानीमै हुनुहुन्छ । आवश्यक थप उपचार र पुनःस्थापनाको प्रक्रिया नेपालमै अघि बढाउने गरी फर्काउने निर्णय गरेका हौँ,” खनालले भने ।

नेपाल फर्किएपछि चित्रकारलाई डल्लुस्थित भाडाको घरमा राख्ने तयारी गरिएको खनालले जानकारी दिए । सोही प्रयोजनका लागि डल्लु क्षेत्रमा घर भाडामा लिइएको पनि उनले बताए । “अस्पताल र आवश्यक स्वास्थ्य सेवाकालागी पहुँच हुने स्थान रोजेका हौँ,” खनालको भनाइ छ ।

चित्रकार सोमबार साँझ नेपाल एयरलाइन्सको नियमित उडानमार्फत काठमाडौं आइपुग्ने कार्यक्रम रहेको छ ।तीन महिनासम्म परदेशी अस्पतालको आईसियु, जनरल वार्ड हुँदै जीवनको कठिन यात्राबाट गुज्रिएकी चित्रकारको स्वदेश आगमनलाई परिवारजन, आफन्त र शुभेच्छुकहरूले आशा र संवेदनाका साथ प्रतीक्षा गरिरहेको खनालले बताएका छन् ।