काठमाडौं – बलिउड सुपरस्टार शाहरुख खानका छोरा आर्यन खानले निर्देशनमा आफ्नो करियरको पहिलो ठूलो उपलब्धि हासिल गरेका छन्। नयाँ दिल्लीमा आयोजित ‘एनडीटीवी इन्डियन अफ द इयर’ समारोहमा उनले डेब्यु वेब सिरिज ‘द ब्याड्स अफ बलिउड’ का लागि ‘बेस्ट डेब्यु डाइरेक्टर अफ द इयर’ अवार्ड प्राप्त गरे।

अवार्ड ग्रहणपछि आर्यनको मन्तव्य निकै चर्चामा रह्यो। उनले ठट्टाको शैलीमा आफूलाई पनि बुबा जस्तै अवार्ड मनपर्ने र भविष्यमा अझ धेरै जित्ने आशा व्यक्त गरे। उनले यो पहिलो अवार्ड बुबालाई नभई आमा गौरी खानलाई समर्पण गरे। आमाले सधैँ राम्रो व्यवहार गर्न सिकाएको र आज यही कारणले अवार्ड पाएको व्यक्त गरे।

आर्यनले आफ्नो वेब सिरिजको कास्ट, क्रू र नेटफ्लिक्सलाई नयाँ निर्देशक प्रति भरोसा गरेकोमा धन्यवाद दिए। सेप्टेम्बर १८ मा रिलिज भएको यो सिरिज बलिउडमाथि बनाइएको व्यङ्ग्यात्मक कथा हो, जसले दर्शक र समीक्षकबाट राम्रो प्रतिक्रिया पाएको छ।

अभिनयभन्दा निर्देशन रोजेका आर्यन खानले पहिलो प्रयासमै सफलता पाउँदै आफ्नो छुट्टै पहिचान बनाउन थालेका छन् ।