काठमाडौं- पाकिस्तानमा अफगान शरणार्थी र आप्रवासी पक्राउ पर्ने क्रम ह्वात्तै बढेको छ । पाकिस्तानबाट प्रकाशित हुने डन अखबारका अनुसार बलोचिस्तानको क्वेट्टा र चगइ तथा पञ्जाबको अटोक क्षेत्रमा सबैभन्दा धेरै अफगान आप्रवासी पक्राउ परेका छन् ।

संयुक्त राष्ट्रसंघीय शरणार्थी निकायको प्रतिवेदन अनुसार यस वर्ष सन् २०२५ को हालसम्म १ लाख ९ सय ७१ जना अफगान पक्राउ परेका छन् । अघिल्लो वर्ष केबल ९ हजार ६ जना अफगान पक्राउ परेका थिए । सन् २०२३ मा भने २६ हजार २ सय ९९ जना पक्राउ परेका थिए ।

राष्ट्रसंघीय शरणाार्थी निकाय यूएनएचसीआरका अनुसार सन् २०२३ अफगान नागरिकता पत्रवाहक कति व्यक्तिलाई पक्राउ गरिन्थ्यो भन्नेबारे तथ्याङ्क राख्ने गरिएको थिएन । सन् २०२३ को जनवरीदेखि मात्रै अन्तर्राष्ट्रिय आप्रवासन संगठन आईओएमले तथ्याङ्क राख्न थालेको हो ।

नोभेम्बर महिनाको २ देखि ८ तारिखसम्म पाकिस्तानमा १३ हजार ३ सय ८० जना अफगान आप्रवासी पक्राउ परेका छन् । यीमध्ये ७६ प्रतिशत अफगान नागरिकता पत्र तथा कागजातविहीन अफगानहरु छन् ।

यीमध्ये अधिकांश ४३ प्रतिशत पञ्जाब प्रान्तबाट पक्राउ परेको डनले उल्लेख गरेको छ । त्यसैगरी, ४१ प्रतिशत चाहिँ बलोचिस्तान प्रान्तबाट पक्राउ परेका छन् ।