काठमाडौं– भारतका तीन कम्पनीले साउदी अरबबाट हरेक वर्ष ३१ लाख मेट्रिक टन डीएपी मल आयात गर्ने भएका छन् । भारतका आईपीएल, कृषक भारती कोओपरेटिभ लिमिटेड र कोरोमान्डेल कम्पनीले साउदी कम्पनीसँग यस्तो सम्झौता गरेका हुन् ।

ती कम्पनीले साउदी अरबको मआदेन कम्पनीसँग सम्झौता गरेका हुन् । सम्झौताअनुसार ती कम्पनीले साउदी अरबबाट सन् २०२५–२६ देखि पाँच वषसम्म हरेक वर्ष ३१ लाख मेट्रिक टन डाइएमोनियम फोस्फेट (डीएपी) मल आयात गर्नेछन् ।

भारतका रसायन तथा मलखादमन्त्री जेपी नड्डाको साउदी भ्रमणका क्रममा यस्तो सम्झौतामा हस्ताक्षर भएको इण्डियन एक्सप्रेसले जनाएको छ । यसअघि सन् २०२४–२५ मा भारतले साउदी अरबबाट १९ लाख मेट्रिक टन डीएपी आयात गरेको थियो ।

त्यसअघि सन् २०२३–२४ मा भारतले साउदी अरबबाट १६.२९ लाख मेट्रिक टन डीएपी आयात गरेको एक्सप्रेसले उल्लेख गरेको छ ।