काठमाडौं– ल्याटिन अमेरिकी मुलुक पारागुएका राष्ट्रपतिले ताइवानसँगको सम्बन्धलाई कायमै राख्ने दृढता व्यक्त गरेका हुन् । पारागुएका राष्ट्रपति सान्टियागो पेनाले ताइवानसँगको ६८ वर्ष लामो सम्बन्ध रणनीतिक एवम् मूल्य–मान्यतामा आधारित रहेको टिप्पणी गरे ।

उनले यस सम्बन्धलाई सबै शक्ति प्रयोग गरी ‘चर्को स्वर’ मा रक्षा गरिने बताए । ताइवान र पारागुएका व्यवसायिक प्रतिनिधिसँग राजधानी अनुन्सियोनमा भेटवार्ता गर्दै राष्ट्रपति पेनाले ताइवानसँगको सम्बन्धले पारागुएको सार्वभौम विदेश नीति तथा लोकतान्त्रिक मूल्य मान्यताप्रतिको प्रतिबद्धता दर्शाउने उल्लेख गरे ।

यसअघि गत डिसेम्बर महिनामा पारागुएले ताइवानको मामिलालाई लिएर आफ्नो मुलुकका आन्तरिक मामिलामा हस्तक्षेप गरेको भन्दै चिनियाँ कूटनीतिज्ञलाई देश निकाला गरेको थियो । पारागुए ताइवानलाई औपचारिक मान्यता दिने दक्षिण अमेरिकाको एकमात्र मुलुक हो ।

राष्ट्रपति पेनाले कुनै समय ताइवानमा अध्ययन गरेका थिए । उनी ताइवानको पक्षधर नेता मानिन्छन् ।

साम्यवादी शासन व्यवस्था रहेको चीनले ताइवानलाई आफ्नै मुलुकको एक हिस्सा मान्दै आएको छ । लोकतान्त्रिक शासन सञ्चालन गर्दै आएको ताइवानलाई आवश्यक परे बल प्रयोग गरेर आफ्नो मातहत ल्याउने चेतावनी दिँदै आएको छ ।