काठमाडौं – केदार घिमिरे र वर्षा सिवाकोटी शीर्ष भूमिकामा रहेको फिल्म ‘माग्ने राजा’को प्रचार सामाग्रीमा मिस पबीको खोजी भइरहेको छ ।

ललितपुरको पुलचोकको एक फिल्म हलमा शुक्रबार फिल्मको गीत सार्वजनिक कार्यक्रममा अनुपस्थित भएपछि मिस पबीको खोजी भयो ।

उनी फिल्ममा अनुबन्ध गर्दा निर्माण पक्षले मुख्य कलाकारलाई जत्तिकै महत्त्व दिएको थियो । फिल्मको पोस्टर, टिजर र गीत सार्वजनिक हुँदासम्म उनको उपस्थिति कतै देखिँदैन ।

न प्रचार सामाग्रीमा मिस पबी छन् न कार्यक्रमहरुमा नै उनी उपस्थित छन् । उनको खोजी हुनुको कारण अर्को पनि छ ।

फिल्म छायाङ्कनका क्रममा बाहिरिएको गसिप, ‘अभिनय गर्न नसकेका कारण उनको भूमिका छोट्याइएको छ ।’

उनको अनुउपस्थितिले कतै उनी फिल्मबाटै त बाहिरिइनन् ? शंका उत्पन्न भएको छ ।

गीत रिलिज कार्यक्रममा यो प्रश्न निर्देशक ऋषि लामिछानेलाई सोधिएको थियो ।

उनले मिस पबीलाई फिल्मबाट निकालिएको चर्चा झुटो भएको दाबी गरे ।

उनले भने, ‘कसरी हल्ला फैलियो थाहा भएन । मैले फिल्मबाट निकालेको छैन । उहाँको अभिनय छ । प्रचार सामाग्रीमा मात्रै उहाँ नअटाएको हो ।’

भूमिका छोट्याएको विषयमा निर्देशक लामिछाने बोल्न चाहेनन् ।