काठमाडौं – गत वर्ष प्रदर्शनमा आएको हिट फिल्म ‘होस्टल ३’का निर्देशक सशान कँडेलले ‘होस्टेल अगेन’ निर्माणको घोषणा गरेका छन् ।

‘होस्टेल अगेन’ फिल्म ‘होस्टल’को चौथो श्रृङ्खला रहेको निर्देशक कँडेलले बताए ।

निर्देशक कँडेलले डेब्यू फिल्म ‘होस्टल ३’को सफलतापछि ‘बाउ भर्सेस’ छोरा निर्माणको घोषणा गरेका थिए ।

कलाकारहरुको व्यस्तताका कारण उक्त फिल्म निर्माणलाई थाती राख्दै ‘होस्टल अगेन’ बनाउने निर्णयमा पुगेको उनले बताए ।

उनले लेखेका छन्, ‘धेरै फिल्महरु निर्माण भइरहेकाले हामीले अनुबन्ध गर्न खोजिएका कलाकारहरूको यो वर्ष समय नमिलेको कारणले दोस्रो कोसेलीको रूपमा निर्माण गर्न खोजिएको बाउ भर्सेस छोरा चाहिँ ०८३ मात्र बन्ने जानकारी गराउँछौं ।’

यस फिल्मका कलाकारहरु चयनको काम बाँकी रहेको उनले जानकारी दिएका छन् । तथापि ‘होस्टल ३’का कलाकारहरु यसमा दोहोरिने उनले संकेत गरेका छन् ।

उनले लेखेका छन्, ‘होस्टल ३ का साथीहरु पनि क्रमशः जोडिदै जानुहुनेछ ।’

यो फिल्मको छायाङ्कन यही वर्ष हुने कँडेलले बताएका छन् ।

यस फिल्मको कथा निर्देशक कँडेलकै हो । पटकथा भने माधव शर्माको रहनेछ । निर्माता शंकर कोइराला हुन् । यी तीन जना ‘होस्टल ३’का टिम हुन् ।

सम्मान इन्टरटेन्मेन्ट ब्यानरले आरोकन फिल्मसँग सहकार्य गरेर यो फिल्म बन्न लागेको हो ।