काठमाडौं – प्रहरीले कर्तव्य ज्यान मुद्दामा १६ वर्षदेखि फरार एकजना अभियुक्तलाई पक्राउ गरेको छ ।

पक्राउ पर्नेमा काभ्रेपलाञ्चोकको महाभारत गाउँपालिका-३ घट्टेका ३७ वर्षीय वीरमानसिंह भुलन तामाङ छन्।

उनलाई काठमाडौं उपत्यका अपराध अनुसन्धान कार्यालयको टोलीले ललितपुर महानगरपालिका-२० सुनाकोठीबाट बिहीबार पक्राउ गरेको हो।

कार्यालयका प्रवक्ता प्रहरी उपरीक्षक काजीकुमार आचार्यका अनुसार तामाङलाई जिल्ला अदालत भक्तपुरले २०७८ भदौ ३ गते २० वर्ष कैद सजाय सुनाएको थियो।

२०६६ साल मंसिर २६ गते राति साढे १२ बजे तामाङले बा१ज ९१४ नम्बरको ट्याक्सी चालक रोशी गाउँपालिका-४ का २३ वर्षीय मेघबहादुर तामाङको हत्या गरेको प्रहरीले जनाएको छ।

वीरमानसिंहले ठमेलबाट कोटेश्वर जानु छ भन्दै भक्तपुर ठिमी नगरपालिका-१६ स्थित नरेफाँट लगेर तामाङको हत्या गरेका थिए।

त्यसबेला वीरमानसिंहसहित चारजना घटनामा संलग्न थिए। अन्य अभियुक्त पक्राउ परिसकेका छन्।

तामाङको खुट्टा बाँधेर घाँटीमा गलबन्दीले कसेर हत्या गरिएको थियो। हत्यापछि उनको साथबाट नगद र मोबाइल लुटपाट गरिएको थियो।

वीरमानसिंहलाई फैसला कार्यान्वयनका लागि जिल्ला अदालत भक्तपुर पठाइएको छ।