काठमाडौं- अल्पसङ्ख्यक इसाई समुदायले पाकिस्तानको पञ्जाब प्रान्तमा लागू भएको नयाँ निर्वाचन कानुनको विरोध गरेका छन् । पञ्जाब प्रान्तमा लागू भएको नयाँ निर्वाचन कानुनले धार्मिक अल्पसङ्ख्यक समुदायलाई मतदान अधिकारमा कठोर बन्देज लगाएको छ ।

पञ्जाब स्थानीय सरकार ऐन २०२५ अन्तर्गत आगामी डिसेम्बर महिनामा स्थानीय चुनाव हुनेछ । यस चुनावले ४ हजारभन्दा धेरै स्थानीय परिषद्मा सदस्य निर्वाचित गर्ने अपेक्षा गरिएको छ ।

पञ्जाबमा पछिल्लो पटक सन् २०१५ मा यस्तो निर्वाचन भएको थियो ।

यद्यपि नयाँ निर्वाचन कानुनले आफूहरुको राजनीतिक अधिकार सङ्कुचित हुने अल्पसङ्ख्यक इसाई धर्मावलम्बीको चिन्ता छ । उनीहरुको चिन्ता खासगरी आरक्षित सिटलाई लिएर रहेको क्रिस्चियनपोस्टले उल्लेख गरेको छ ।

नयाँ प्रणालीले धार्मिक अल्पसङ्ख्यक, महिला र श्रमिकजस्ता समाजको कमजोर तप्कालाई राजनीतिक सीमान्तकरणको जोखिम बढाएको रदारी तहरिकका अध्यक्ष सामसन सलामतको भनाइ छ ।