काठमाडौं – निकोलश भुसाल फेरि पक्राउ परेका छन् । केही दिनअघि ५० हजार धरौटीमा रिहा भएका भुसाललाई बिहीबार साँझ प्रहरीले पुनः पक्राउ गरेको हो ।

काठमाडौँ प्रहरीका प्रवक्ता एसपी पवनकुमार भट्टराईका अनुसार भुसालको मुद्दा अझै अनुसन्धानमै रहेकाले थप सोधपुछका लागि नियन्त्रणमा लिइएको हो । सोधपुछपछि आजै छाडिने र भोलि पुनः उपस्थित हुनुपर्ने बताइएको छ।

भुसाललाई कात्तिक १८ गते गोरखाको सरस्वती आश्रमबाट पक्राउ गरिएको थियो। उनले कात्तिक १३ गते संवाद डबलीको कार्यक्रममा प्रहरीसहित राज्यका संवेदनशील निकाय विस्फोट गरेर ध्वस्त बनाइदिने अभिव्यक्ति दिएका थिए।

यसै विषयमा अदालतले भुसाललाई धरौटी वा साधारण तारेखमा रिहा गर्न आदेश दिएपछि कात्तिक २५ गते प्रशासनले ५० हजार धरौटीमा छाडेको थियो।