काठमाडौं- इजरायलमा दिवंगत भएका नेपाली विद्यार्थी विपिन जोशीप्रति श्रद्धाञ्जली अर्पण गर्न आयोजित सभामा प्रधानमन्त्री सुशीला कार्कीले विपिनको साहस र समर्पणप्रति गहिरो श्रद्धा प्रकट गरेकी छन् । प्रधानमन्त्री कार्कीले भनिन्, “आज शोकको घडी छ। विगत दुई वर्षदेखि विपिन जोशीलाई खोजिरहेका तीन करोड नेपालीका आँखा रसाएका छन्। हामी सबैलाई विश्वास थियो, उनी जीवितै फिर्ता हुनेछन्, सकुशल पाउँछौँ भन्ने हाम्रो आशा थियो।”

उनका अनुसार विपिनले चाहेको भए आफू बाँच्न सक्थे, तर उनले आफ्ना साथीहरूलाई जोगाउने क्रममा अपहरणमा परेका थिए। “उनले कति दुःखकष्ट भोगे होलान् भन्ने सोच्दा पनि मन विचलित हुन्छ,” प्रधानमन्त्रीले भनिन् । प्रधानमन्त्री कार्कीले विपिनलाई “देशको गौरव”का रूपमा सम्झिंदै भनिन्, “तीन शब्दको विपिन नाम छ, तर उनको बहादुरी र साहसको कथा हामी कहिल्यै बिर्सने छैनौँ । उनी हाम्रो हृदयमा सधैँ जीवित रहनेछन् ।”

उनले विपिनको परिवारप्रति श्रद्धा र कृतज्ञता व्यक्त गर्दै भनिन्, “यस्तो बहादुर छोरा जन्माउने आमा र उनको खोजीमा अथक प्रयास गर्ने बहिनीप्रति पनि म नतमस्तक छु।” प्रधानमन्त्रीले विपिनले आफ्नो देशको नाम मात्र होइन, इजरायली जनता र सरकारबाट पनि सम्मान प्राप्त गरेको बताउँदै उनलाई “साँचो बहादुर युवा”को रूपमा स्मरण गर्न सबैलाई आग्रह गरिन् ।