काठमाडौं– दक्षिण भारतीय सुपरस्टार विशाल हाल आफ्नो आगामी र बहुप्रतिक्षित फिल्म मगुडमको तयारीमा व्यस्त छन् । रवि अरासु निर्देशित यो ग्याङ्स्टर–एक्सन ड्रामा अहिलेदेखि नै चर्चा र उत्सुकताको केन्द्रमा रहेको छ । 

तर हालै विशालले दिएका तीखा अभिव्यक्तिले उनी पुनः चर्चामा आएका छन् । यसपटक फिल्मको कारण होइन, चलचित्र पुरस्कार प्रणालीमाथि उनको कडा प्रहारका कारण ।

एक भारतीय पोडकास्टमा आफ्नो विचार राख्दै उनले भने, आफू पुरस्कारमा कहिल्यै विश्वास नगर्ने व्यक्ति हुन् । उनको दृष्टिमा पुरस्कारको अवधारणा नै पागलपन जस्तो छ । विशालले प्रश्न उठाए, ‘चार जनाले बसेर कसरी सात करोड जनताको मनपर्ने अभिनेता वा अभिनेत्रीको निर्णय गर्न सक्छन् ? के ती चार जना सबैका मालिक हुन् ?’

त्यो मात्र होइन, उनले राष्ट्रिय अवार्डसम्ममाथि पनि सवाल उठाउँदै भने कि जनताको राय बिना पुरस्कार वितरण गर्नु पूर्णरूपमा बेकार कुरा हो । उनका अनुसार, ‘सर्वेक्षणमार्फत जनताको आवाज सुन्ने प्रणाली नै सही तरिका हो । अहिले त केही व्यक्तिहरू भेला भएर मनपर्ने कलाकारलाई ‘सर्वश्रेष्ठ’ ठहर्याउने जस्तो मात्र भएको छ, जुन मलाई पूर्ण रूपमा बकवास लाग्छ ।’

विशालको यो तिखो भनाइले फिल्म उद्योगभित्र नयाँ बहस सुरु भएको छ । उनले यो पनि स्पष्ट पारे कि यो धारणा आफुले अवार्ड नपाएको कारण होइन, बरुअवार्ड प्रणालीमै रहेको असमानता र पारदर्शिताको अभावप्रतिको असहमतिको परिणाम हो ।

यसैबीच, मगुडम मा विशालले एकभन्दा बढी अवतारमा अभिनय गर्ने बताइएको छ। फिल्ममा नायिका दुशारा विजयन मुख्य भूमिकामा छिन् ।

तर यो फिल्म हाल केही अफवाहका कारण पनि चर्चामा छ । निर्देशक रवि अरासु र अभिनेता विशालबीच सृजनात्मक मतभेद भएको र विशालले निर्देशन आफैं सम्हालेको दाबी आएको थियो । तर, रविले यी सबै कुरा पूर्ण रूपमा अस्वीकार गरेका छन् र फिल्मको निर्माण सुचारु रूपमा अघि बढिरहेको बताएका छन् ।

अब सबैको नजर मगुडममा विशालको नयाँ अवतार र उनको ‘नो-अवार्ड’ सिद्धान्तमा केन्द्रित छ । फिल्म प्रदर्शनअघि नै उनले उठाएको यो विचारले दर्शकबीच रोचक बहस जन्माइरहेको छ -के वास्तवमै चलचित्र पुरस्कारहरू जनताको आवाज हुन्, वा केही व्यक्तिको निर्णय मात्रै ?