काठमाडौं– प्रमुख प्रतिपक्षी नेकपा (माओवादी केन्द्र)का सांसद शक्तिबहादुर बस्नेतले नेपाली कांग्रेस र नेकपा एमाले दुईदलीय व्यवस्थाको ‘मिसन’मा अगाडि बढिरहेको आरोप लगाएका छन् । 

प्रतिनिधिसभाको बुधबार बसेको बैठकको शून्य समयमा उनले गठबन्धन गरेर सरकार सञ्चालन गरिरहेका कांग्रेस–एमाले दुईदलीय व्यवस्थाउन्मुख ‘मिसन’मा रहेको आरोप लगाएका हुन् ।  

सांसद बस्नेतले नेपालमा कांग्रेस–एमालेको दुईदलीय अवधारणा सैद्धान्तिक र व्यवहारिक रूपमा उपयुक्त नभएको पनि जिकिर गरे । 

‘प्रमुख सत्तारूढ दुई दलहरू दुई दलीय व्यवस्थाको मिसनमा हिँडिरहेको देखिन्छ । नेपालजस्तो बहुबर्गीय सांस्कृतिक, सामाजिक र भौगोलिक हिसाबले विवितायुक्त समाजमा यो दुई दलीय अवधारणा न त सैद्धान्तिक रूपमा ठीक छ, न त व्यवहारिक ढंगले उपयुक्त हुन्छ,’ उनले भने । 

सांसद बस्नेतले कांग्रेस–एमालेको दुईदलीय ‘मिसन’लाई जनताले पूरा हुन नदिने पनि दाबी गरे ।

 ‘यो उहाँहरूको दुई दलीय व्यवस्थाको मिसन अन्ततः एकदलीयमा पुग्ने होला । र प्रमुख दुई दलमध्ये त्यो अवसर कसले प्राप्त गर्नु हुनेछ, त्यो उहाँहरूले नै सोचिरहनुभएको होला । तर, नेपाली जनताले उहाँहरूको यो मिसन पूरा गर्न दिने छैनन्,’ बस्नेतले भने ।