काठमाडौं– पाकिस्तानमा तीन जना हिन्दू धर्मावलम्बी बालिकालाई अपहरण गरी धर्मान्तरण गराएर जबरजस्ती विवाह गराएको घटना सार्वजनिक भएको छ । पाकिस्तानको सिन्ध प्रान्तमा यस्तो घटना सार्वजनिक भएको हो ।

सिन्ध प्रान्तको टान्डो अल्लाहयार जिल्लामा खेन्छी कोहली, लतादेवी मेघवड र मीना मेघवडलाई अपहरण गरी धर्मान्तरण गराएर जबरजस्ती विवाह गराएको घटना सार्वजनिक भएको हो । उनीहरुलाई विभिन्न स्थानबाट अपहरण गरिएको पाकिस्तानबाट प्रकाशित हुने द एक्सप्रेस ट्रिब्युन अखबारको अनलाइन सँस्करणले जनाएको छ ।

पीडितका परिवारले प्रहरीमा जाहेरी दिएका छन् । घटनाका आरोपीविरुद्ध पाकिस्तानी अपराध संहिता ३६५ बी र ३४ बमोजिम कारवाही प्रक्रिया अघि बढाइएको ट्रिब्युनले जनाएको छ ।

घटनाको विरोधमा सिन्धका हिन्दू समुदायले प्रदर्शन गरेका छन् । पछि प्रहरीले अपराधीलाई कारवाही गर्ने र अपहरणमा परेका बालिकालाई उद्धार गर्ने आश्वासन दिएपछि प्रदर्शन शान्त भएको जनाइएको छ ।

सिन्ध प्रान्तको मानव अधिकार आयोगका अध्यक्ष इकवाल अहमद डेथोले घटनाबारे निष्पक्ष अनुसन्धान गर्न प्रहरीसमक्ष आग्रह गरेका छन् ।