काठमाडौं- नेपालस्थित युरोपेली युनियनका राजदूतसहितको प्रतिनिधिमण्डल मंगलबार नेपाल विद्युत् प्राधिकरणको केन्द्रीय कार्यालय पुगेको छ ।

उक्त टोलीले अवलोकन भ्रमणका क्रममा नेपाल-भारत विद्युत् व्यापार र ग्रामीण विद्युतीकरणबारे जानकारी लिएको छ ।

प्राधिकरणका स्रोतका अनुसार नेपालका लागि युरोपेली युनियनका राजदूत भेरोनिक लोरेन्जोको नेतृत्वको टोलीमा अस्ट्रिया र स्विडेनका राजदूतसमेत थिए ।

त्यसैगरी टोलीमा विभिन्न दूतावासका उच्च पदस्थ अधिकारीसहित २० जना सहभागी थिए ।

टोलीले स्यूचाटारस्थित भार प्रेषण केन्द्रको कार्यअवस्था, नेपाल-भारत विद्युत् व्यापारबारे जानकारी लिएको छ । त्यसैगरी भार प्रेषण केन्द्रबाट गरिएको विद्युत् वितरण नियन्त्रण प्रक्रियाबारे पनि राजदूतहरूले जिज्ञासा राखे ।

राजदूतहरूको विषेश चासो युरोपेली युनियनको सहयोगमा भरतपुर, पोखरा र बुटवलको त्रिकोणमा सञ्चालित ग्रामीण विद्युतीकरणबारे थियो ।

उनीहरूले त्यसको अवस्था, उत्पन्न प्रभाव र चुनौतीबारे पनि जिज्ञासा राखेका थिए । राजदूतहरूका प्रश्नको जवाफ प्राधिकरणका कार्यकारी निर्देशक हितेन्द्र शाक्यले दिएका थिए । उनले राजदूतहरूलाई प्राधिकरणको भार प्रेषण केन्द्रबारे विस्तृत जानकारी गराएका छन् ।