काठमाडौं- सरकारले नयाँ आर्थिक वर्षको बजेट ल्याउने तयारी गरेसँगै विद्युतीय गाडी आयात ह्वात्तै बढेको छ ।

सरकारले नयाँ बजेटमार्फत् करका दर हेरफेरको तयारी गरिरहँदा यतिबेला काठमाडौंको चोभारस्थित सुक्खा बन्दरगाहमा विद्युतीय गाडीले भरिएका छन् । त्यहाँ सयौँको संख्याका विभिन्न कम्पनीका विद्युतीय गाडी भन्सार जाँचपासका लागि पालो कुरिरहेका छन् ।

उत्तरतर्फ रसुवागढी, तातोपानी र दक्षिणतर्फ वीरगञ्ज नाका हुँदै धेरै गाडी भित्रिएका छन् । अन्य नाकाबाट पनि भित्रिएका यी गाडी यतिबेला भन्सार पासको प्रक्रियामा रहेका छन् । गाडी खासगरी तातोपानी र रसुवागढी नाकाबाट भित्र्याइएका हुन् ।

सरकारले बजेटमार्फत अन्त:शुल्क तथा भन्सार महसुल बढाउन सक्ने भएकाले व्यवसायीहरूले त्यसअघि नै गाडी ल्याएका हुन् ।

वैशाखमा मात्रै करिब १९ सय विद्युतीय गाडी आयात भएका छन् । अहिले बढी मात्रामा ५१ देखि १०० किलोवाटका गाडी आयात भएका छन् ।

सरकारले नयाँ बजेट प्रस्तुत गर्दा गाडीहरूमा लाग्ने भन्सार, अन्तःशुल्क र अन्य करहरूमा परिवर्तन गर्ने सम्भावना हुन्छ। यदि आगामी बजेटमा गाडीमा कर बढ्ने सम्भावना देखिए ब्यापारीहरूले त्यसअघि नै ठूलो परिमाणमा गाडी आयात गर्छन् । पुरानो (कम) कर दरमा गाडी भित्र्याएर बेच्ने उद्देश्य उनीहरूले बोकेका हुन्छन् ।

अहिले सडकमा विद्युतीय गाडीको संख्या उल्लेख्य बढेको छ । सरकारले यस्ता गाडीमा भन्सार र अन्तःशुल्क कम गरेपछि ईभी बजार चलायमान बनेको हो ।

नयाँ गाडी किन्ने मात्रै नभई अपग्रेड गर्ने वा फेर्ने ग्राहकको रोजाइमा पनि ईभी पर्न थालेको छ । बढ्दो मागलाई मध्यनजर गरेर कम्पनीहरूले पनि धमाधम ईभी गाडी भित्र्याइरहेका छन् । ईभी गाडीतर्फ नेपालमा चिनियाँ वर्चश्व छ । भारतीय कम्पनीले पनि धमाधम ईभी गाडी ल्याइरहेका छन् ।

तस्बिरहरू : नेपाल फोटो लाइब्रेरी