काठमाडौं– नेपालमा रहेका २० वटा वाणिज्य बैंकहरुले चालु आर्थिक वर्ष २०८१/८२ को तेस्रो त्रैमासको वित्तीय विवरण सार्वजनिक गरेका छन् । 

बैङ्कहरूले सार्वजनिक गरेको अपरिकृत वित्तीय विवरण अनुसार सबैभन्दा बढी नाफा घट्नेमा एनआईसी  एशिया बैंक रहेको छ । उक्त बैंकले गत वर्षको त्रैमासको तुलनामा ९१.८१ प्रतिशतले खुद नाफा घटेको छ । 

बैंकले चैत मासान्तसम्ममा १५ करोड ६७ लाख ७५ हजार रुपैयाँ खुद नाफा गरेको छ । जुन अघिल्लो वर्षको सोही अवधिको तुलनामा करिब ९२ प्रतिशतले कम हो । अघिल्लो आर्थिक वर्षको चैत मसान्तसम्ममा बैंकले १ अर्ब ९१ करोड ४८ लाख ९१ हजार रुपैयाँ नाफा कमाएको थियो । 

बैंकको खुद ब्याज आम्दानी, सञ्चालन नाफा र खराब कर्जा बढेका कारण खुद नाफा घटेको देखिन्छ । 

बैंकको उक्त अवधिमा खुद ब्याज आम्दानी २.७६ प्रतिशतले घटेर ७ अर्ब ९६ करोड २५ लाख १९ हजार रुपैयाँमा सीमित भएको छ । सञ्चालन नाफा ६४.४० प्रतिशतले घटेर १ अर्ब २९ करोड ५ लाख ९ हजार रुपैयाँमा पुगेको छ । 

बैंकको खराब कर्जा ०.१६ प्रतिशतले बढेर १.९२ प्रतिशतलेमा पुगेको छ । बैंकको प्रतिशेयर नेटवर्थ १९९.३ रुपैयाँ छ भने प्रतिशेयर आम्दानी १५.८८ रुपैयाँले घटेर १ रुपैयाँ ४१ पैसामा पुगेको छ । 

बैंकको घाटा बढ्नुको ९ वटा कारण रहेको बैंकले जनाएको छ । जसमा आन्तरिक रूपमा ३ वटा कारण बढ्दो निष्क्रिय कर्जा, बढ्दो सञ्चालन लागत र गैर बैंकि सम्पत्तिको बिक्रीमा ढिलाइ भएको बैंकले जनाएको छ । 

बाह्य कारणको रूपमा बैंकले ६ वटा कारण देखाएको छ । जसमा पूर्वी युरोप तथा मध्य पूर्वमा देखा परेको द्वन्द्वका कारण विश्व अर्थतन्त्रमा आएको मन्दी, राजश्व आम्दानी र विकास खर्चमा कमी, न्यून कर्जा माग, खस्कँदो ब्याजदर अन्तर, बढ्दो प्रतिस्पर्धात्मक वातावरण र बढ्दो सुचना प्रविधि चुनौती बैंकले औँल्याएको छ ।