जनकपुरधाम– मधेश प्रदेशसभाको बैठक आज बस्दैछ । उपसभामुख बबिता राउत इसरको निर्देशनमा प्रदेशसभा सचिवालयले आज दिउँसो १ बजेका लागि बैठक बोलाएको हो ।

आजको बैठकमा मधेश प्रदेशसभाका सभामुख रामचन्द्र मण्डलमाथि दर्ता भएको महाअभियोगमाथि छलफल हुने बताइएको छ ।

मधेस प्रदेशसभा सञ्चालनका लागि मङ्गलबार एमालेबाहेक विभिन्न पार्टीका मधेस प्रदेशसभाका ३२ जना प्रदेशसभा सदस्यहरूले उपसभामुख इसरसमक्ष बैठक आह्वानको माग गरेका थिए ।

प्रदेशसभा नियमावलीमा प्रदेशसभाका २५ प्रतिशत सदस्यले बैठक बोलाउन माग गरेमा बैठक बोलाउनुपर्ने कानूनी व्यवस्था छ ।

गत कात्तिक २७ गते मधेश प्रदेश सभामा सात दलीय गठबन्धनका ७४ जना प्रदेश सांसदले सभामुख मण्डलविरुद्ध पद अनुकुल आचरण नगरेको भन्दै महाअभियोग प्रस्ताव दर्ता गराएका थिए ।