काठमाडौं – फागुन १ गते प्रदर्शन मिति तोकिएको फिल्म ‘कल्ली’को तीन पोस्टर सार्वजनिक गर्दै निर्माण पक्षले प्रचारको काम सुरु गरेको छ ।

तीन पोस्टरमा फिल्मका पाँच शीर्ष कलाकार नायकहरु सौगात मल्ल, सुलक्षण भारती, नाजिर हुसेन, नायिका वर्षा राउत र बालकलाकार मञ्जिला बानियाँलाई फिचर्ड गरिएको छ ।

एक पोस्टरमा वर्षा, नाजिर र मञ्जिलालाई फिचर्ड गरिएको छ । वर्षा र नाजिर विवाहित जोडी मञ्जिला उनीहरुको छोरीको भूमिकामा रहेको पोस्टरले संकेत गर्छ ।

अर्को पोस्टरमा सुलक्षणलाई भिन्न गेटअपमा प्रस्तुत गरिएको छ । उनको शरीरमा कपडाको रुपमा लगौटी मात्रै छ । गलामा पोते लगाएका छन् भने हातमा हतियार छन् ।

सौगत भने पश्चिमी हिमाली भेगको अधवैशे पुरुषको भूमिकामा प्रस्तुत छन् ।

यी पोस्टरहरुले फिल्मप्रतिको दर्शकको कौतुहलता बढाउन सक्ने देखिन्छ ।

यस फिल्ममा वेनिशा हमाल, बेगम नेपाली, बिनोद न्यौपाने र रियर राईको पनि अभिनय रहेनेछ ।

किरण नेपाली प्रस्तुतकर्ता रहेको यस फिल्मको कथा लक्ष्मण सुनारले लेखेका हुन् । निर्देशक पनि सुनार नै हुन् । पटकथा भने महेश दवाडीले लेखेका हुन् ।

लेकाली इन्टरटेन्मेन्ट प्रालि र कस्तुरी प्रोडक्सनको प्रस्तुतिमा बनेको यस फिल्मको प्रस्तुतकर्ता किरण नेपाली हुन् ।