काठमाडौ– सामाजिक सञ्जालमा शेयर बजार सम्बन्धी भ्रामक सामाग्री आएकोमा नेपाल स्टक एक्सचेञ्ज (नेप्से) ले चासो देखाएको छ । नेप्सेले एक विज्ञप्ति जारी गर्दै चासो देखाएको हो । 

नेप्सेको नाममा सामाजिक सञ्जालहरूमा सेयर बजार सम्बन्धी भ्रामक तथा अनधिकृत सामग्री स्टक टिप, सेयर किनबेचका सिफारिस, नक्कली भिडियो/अडियो लगायतका झुटा दाबीहरू देखिन थालेको र यस्ता गतिविधिले सर्वसाधारण लगानीकर्ताको मनोबलमा प्रतिकूल असर पर्ने नेप्सेको भनाई थियो । 

‘नेप्सेले कुनै पनि धितोपत्र किन्न वा बेच्न सल्लाह नदिने प्रतिफलको ग्यारेन्टी नगर्ने, खरिद वा विक्री गर्ने मूल्य नतोक्ने प्रष्ट पार्न चाहन्छौँ त्यस किसिमका सामग्री नितान्त भ्रामक र अनधिकृत हुन्’, नेप्सेका प्रवक्ता मुराहरि पराजुलीले जारी गरेको विज्ञप्तिमा भनिएको छ ।
 
नेप्सेले सूचना/प्रेस नोट नेप्सेको वेबसाइट र आधिकारिक सामाजिक सञ्जालबाट प्रकाशित गर्ने भएकाले नेप्सेको नाम अनधिकृत प्रयोग गर्ने, नेप्सेसँग मिल्दोजुल्दो नाम राखेर वेबसाइट चलाउने एप बनाउने, च्याट ग्रुप बनाउने लगायतका कार्य दण्डनीय अपराध हुने नेप्सेले बताएको छ । 

हल्ला, उक्साहट, अनधिकृत घ्याट–ग्रुप, क्लबहाउस, टेलिग्राम लगायतका आधारमा कारोबार नगर्न नेप्सेले आग्रह गरेको छ । 

नेप्सेको नाम, लोगो, भवनको तस्बिर प्रयोग गरेर एप पेज, समूह बनाइएका माध्यमहरूमा व्यक्तिगत विवरण नदिनुहोस् कसैलाई पनि आफ्नो पासवर्ड नदिन समेत नेप्सेले आग्रह गरेको छ ।  ।

शङ्कास्पद सामग्री देखिएमा स्क्रिनसट लिङ्क सहित नेप्सेको इमेल मार्फत जानकारी दिन नेप्सेले आग्रह गरेको छ ।