बिराटनगर– पूर्वाञ्चल विश्वविद्यालय अन्तर्गत इञ्जिनियरिङ विषयको छैठौं सेमेष्टरको परीक्षा चलिरहेका बेला मंगलबार बिराटनगरको पोखरियास्थित परीक्षास्थलमा प्रहरीले अचानक छापा हान्यो ।

क्याम्पसको ल्याबमा करारमा कार्यरत कर्मचारी मनिष यादव परीक्षार्थीसँगै गार्ड बसिरहेका थिए । प्रहरीले यादवलाई पार्किङ गरिराखेको स्कुटरको डिक्की खोल्न लगायो ।

यादवको स्कुटरको डिक्कीमा ८० हजार रुपैयाँ नगद र केही उत्तरपुस्तिका फेला प¥यो । उत्तरपुस्तिका केही नलेखिएको खाली अवस्थामा थियो ।

विश्वविद्यालयको कर्मचारी स्रोतले खबरहबलाई दिएको जानकारी अनुसार विद्यार्थीसँग मिलेमतो गरेर आर्थिक लेनदेनका आधारमा बाहिरैबाट प्रश्नपत्र आउट गरी उत्तर पुस्तिकामा लेख्न लगाउने कार्य भइरहेको उजुरी परेपछि प्रहरीले परीक्षास्थलमा छापा मारेको थियो ।

तर, यादव भने आफूमाथि गलत आरोप लगाइएको बताउँछन् । यादवले खबरहबसँग भने, ‘मैले एकठाउँमा तिर्नुपर्ने रकम डिक्कीमा राखेको थिएँ, उत्तरपुस्तिका चाहिँ अस्ति पानी परेका कारण डिक्कीमा राखेको थिएँ, भुलबस त्यो निकाल्न बिर्सिएको रहेछ । तर, यो विषयलाई अहिले मिडियामा मेराविरुद्ध ठूलो इस्यु बनाउने काम भयो ।’

यादवको स्कुटरमा भेटिएको रकम र उत्तरपुस्तिकाबारे प्रहरीले लिखित मुचुल्का खडा गरेको छ । यसबारे विश्वविद्यालयले आफैं छानविन गर्ने वचन दिएपछि प्रहरीले यादवलाई पक्राउ नगरी मुचल्का बनाएर छाडिदिएको हो ।

इञ्जिनियरिङको परीक्षामा विगतदेखि नै धाँधली र चलखेल हुने गरेको विश्वविद्यालयकै कतिपय कर्मचारीको गुनासो छ । ती कर्मचारीको दाबीअनुसार प्रहरीले शंकास्पद व्यक्तिलाई पक्राउ गरेर अनुसन्धान अगाडि बढाउनुपर्नेमा विश्वविद्यालय प्रशासनसँगको मिलेमतोमा त्यत्तिकै छाडिदिएको गुनासो बढेको छ ।

तर, प्रहरी भने केही नलेखिएको उत्तरपुस्तिका भेटिएकाले प्रमाण नपुगी व्यक्तिलाई पक्राउ गर्न नसकिने जनाएको छ ।

विश्वविद्यालयका एक कर्मचारी भन्छन्, ‘इञ्जिनियरिङको परीक्षामा ठूलो चलखेल हुने गरेको हामीलाई आशंका छ । तर, यो घटनापछि न कसैमाथि कारवाही भयो, न त परीक्षा नै रोकिएको छ । पुरानै टिमबाट परीक्षा गराउने काम भइरहेको छ ।’
असार १८ देखि शुरु भएको इञ्जिनियरिङ छैठौं सेमेष्टरको परीक्षा साउन १९ सम्म चल्ने तालिका रहेको छ ।

मंगलबारको घटनापछि पूर्वाञ्चल विश्वविद्यालयले पूर्वपरीक्षा नियन्त्रण मोहनबहादुर बस्नेतको संयोजकत्वमा तीन सदस्यीय छानबिन समितिसमेत बनाइसकेको विश्वविद्यालय स्रोतले बतायो ।

विश्वविद्यालयका कतिपय कर्मचारी भने यो विषयमा अख्तियार दुरुपयोग अनुसन्धान आयोग र नेपाल प्रहरीको सीआईबीले समेत छानविन गर्नुपर्ने बताउँछन् ।