काठमाडौं– संघीय संसद्को तल्लो सदन प्रतिनिधिसभाको बिहीबारको बैठक चलिरहेको छ । बैठकमा विनियोजन विधेयक २०८२ का विभिन्न मन्त्रालयगत शीर्षकहरूमाथि छलफल भइरहेको छ । 

छलफलमा सत्ता पक्ष र प्रतिपक्षमा रहेका विभिन्न दलका सांसदहरू भाग लिइरहेका छन् । तर, भिजिट भिसा प्रकरणको विषय अघि सारेर आन्दोलनरत दल राष्ट्रिय स्वतन्त्र पार्टी (रास्वपा) भने सदनमा फरक ढङ्गले प्रस्तुत भइरहेको छ ।

गृहमन्त्री रमेश लेखकको राजीनामा र भिजिट भिसा प्रकरण छानबिनका लागि समिति गठनको माग गर्दै आएको राष्ट्रिय स्वतन्त्र पार्टी (रास्वपा) का सांसदहरू पुस्तकहरू अध्ययन गरिरहेका छन् । 

अघिल्ला बैठकहरूमा वेल घेराउ गरेर नाराबाजी गर्दै आएका रास्वपाका सांसदहरू बिहीबार वेलमै पलेँटी कसेर पुस्तक पढी रहेका छन् । 

भिजिट भिसा प्रकरणमा रास्वपाजस्तै आन्दोलनरत अर्को प्रतिपक्षी राष्ट्रिय प्रजातन्त्र पार्टी (राप्रपा) भने बैठक बहिष्कार गरेर सुरुवात मै सदनबाट बाहिरिएको थियो ।