काठमाडौं – गत वर्षको तिहारमा फिल्म ‘पूर्णबहादुरको सारङ्गी’ प्रदर्शनमा आयो । यही फिल्मबाट सहायक कलाकारबाट विजय बराल नायक बने ।

यो फिल्मले ४६ करोडभन्दा बढी ग्रस कलेक्सन गरेर कीर्तिमान कायम गर्‍यो । यही फिल्मबाट विजयलाई प्रस्ताव आउने भूमिका फेरिएको छ ।

यसभन्दा पहिला उनलाई सहायक भूमिकामा प्रस्ताव आउथ्यो भने अहिले लिड रोलका लागि आउने गरेको छ । तर, विजयले छानेर मात्रै फिल्म साइन गर्ने गरेका छन् । उनले दुई फिल्म साइन गरे ।

यी दुवै फिल्म ‘वरिष्ठ बलराम’ र ‘जनै हराएको बाहुन’को छायाङ्न सकिएको छ । ‘वरिष्ठ बलराम’को प्रदर्शन मिति आगामी लक्ष्मी पूजा तोकिएको छ । तर, विजय यसको सोलो नायक होइनन् । शीर्ष भूमिकामा दयाहाङ राई पनि छन् ।

तर, गत तिहार यता विजय सहायक भूमिकामा रहेका फिल्महरु ‘राजागंज’, ‘अञ्जिाला’, ‘लाज शरणम्’लगायत प्रदर्शनमा आए । यी फिल्म विजयले ‘पूर्णबहादुरको सारङ्गी’भन्दा नै पहिला गरेका हुन् ।

सोहीकारण नायकको परिचय बनिसक्दा पनि उनी सहायक भूमिकामा रहेका फिल्म प्रदर्शनमा आइरहे ।

विजयलाई पुनः लिड कलाकारका रुपमा हेर्न दर्शक उत्सुक छन् । तर, यो मिति कहिले ? भन्ने ठेगान लागेको थिए । अब भने प्रतिक्षा समाप्त भएको छ ।

विजय लिड रोलमा रहेको फिल्म ‘जनै हराएको बाहुन’ भदौ ६ गते प्रदर्शनमा आउने भएको छ । निर्माण टिमले सोमबार फिल्म एक पोस्टर सार्वजनिक गरी प्रदर्शन मिति घोषणा गरेको हो ।

यो फिल्मले आमाको खुसीका लागि सम्पत्ति कमाउन गाउँबाट सहर पस्ने छोराको संघर्षको कथामा समेटेको छ ।

यो फिल्मको छायाङ्कन गत साता सम्पन्न भएको हो । अहिले पोस्ट प्रोडक्सनको काम भइरहेको छ । फिल्ममा नायिका केकी अधिकारी, मिरुना मगर पनि शीर्ष भूमिकामा रहेको बताइएको छ ।

यस फिल्मको निर्देशक हिमाल न्यौपाने हुन् । उनको यो डेब्यू फिल्म हो । कथा, पटकथा र संवाद भानुभक्त ढकालले लेखेका हुन् ।

पेपरक्लिप प्रोडक्सनको ब्यानरमा निर्माण भएको यस फिल्मका निर्माता कमल न्यौपाने र विमल न्यौपाने हुन् ।