काठमाडौं – नायका दीलिप रायमाझीकी छोरी दिव्याले गत वर्ष फिल्म ‘एक्टर ः टेकवान’बाट ठूलो पर्दामा डेब्यू गरिन् । यत वर्ष नै उनका यो र ‘पिताम्बर’ गरी दुई फिल्म प्रदर्शनमा आए ।

यी दुवै फिल्मको व्यापार कमजोर नै रह्यो । तर, दिव्याको व्यस्तातालाई भने यसको फरक पारेको देखिँदैन । उनका अझै दुई फिल्म छन् ।

उनले गत वर्ष नै नयाँ फिल्म ‘माया प्रीति’ साइन गरेकी थिइन् । अहिले फेरि उनले अर्को फिल्म ‘राम नाम सत्य’ साइन गरेकी हुन् ।

‘राम नाम सत्य’ निर्माण टिमले सोमबार दिव्यासँग कागजी सम्झौता भएको सार्वजनिक गरेको हो ।

साइन गरेपछि दिव्या भन्छिन्, ‘स्क्रिप्ट मन प¥यो । मलाई प्रस्ताव गरिएको भूमिका पनि राम्रो छ । त्यही भएर काम गर्न तयार भएँ ।’

यस फिल्मको नायकमा विराज भट्ट र सशील श्रेष्ठ पहिला नै अनुबन्ध भइसकेका छन् । विराजले यही फिल्मका कारण ‘१२ गाउँ’को सिक्वेलको काम पछाडि सारेको बुझिएको छ ।

विराज र सुशीलसँग सहकार्य गर्न पाउँदा दिव्या उत्साहित देखिएकी छन् ।

अब केही कलाकारलाई चयन गरेर वर्कसप थाल्ने तयारीमा निर्माण पक्ष रहेको छ । छायाङ्कन भने साउनबाट सुरु हुने बताइएको छ ।

माइकल इन्टरटेन्मेन्ट हाउसको प्रस्तुतिमा बन्न लागेको यो फिल्ममा माइकल चन्दको लेखन छ । उपेन्द्र शाही, स्वेता विमली र उत्तम गुरुङ यसका निर्माता हुन् ।