काठमाडौं– नेपाली कांग्रेसका नेता अर्जुननरसिंह केसीले शिक्षकहरूको आन्दोलनलाई बेवास्ता गरेर सरकारले अपराध गरिरहेको टिप्पणी गरेका छन् । १८ दिनसम्म पनि शिक्षकहरूको माग सुनुवाइ नभएपछि उनले शनिबार सामाजिक सञ्जाल एक्समा सरकारले अभिभावक र विद्यार्थीमाथि अपराध गरिरहेको टिप्पणी गरेका हुन् । 

‘लाखौँलाख सामुदायिक विद्यार्थीहरूको भविष्यसँगै अभिभावकमा परिरहेको यो गम्भीर दुःख र चिन्तासँग खेलवाडको रूपमा सरकार सुतुर्मुर्गजस्तो टाउको लुकाएर बस्नु अपराध हो,’ नेता केसीले भनेका छन् ।  

उनले तीन–तीन पटक आफैँले गरेको लिखित सम्झौतामा राज्य उदासिन हुनु गम्भीर बेइमानीमात्रै नभएर खेदजनक भएको पनि बताएका छन् ।  

‘झण्डै २९-३० हजार सामुदायिक विद्यालयका शिक्षकहरू १८औँ दिनदेखि सडक सङ्घर्षमा छन्,’ केसीले भनेका छन्, ‘०७५ फागनु ९ पहिलो, ०७८ फागुन ९ दोश्रो र तेस्रो सहमति ०८० असोज ५ तीनपटक राज्यद्वारा गरिएको लिखित सम्झौताप्रति राज्य उदासीन हुनु यो गम्भीर बेइमानीमात्र होइन खेदपूर्ण छ ।’

केसीले शिक्षकहरूसँग तीन–तीन पटकसम्म राज्यले गरेको सम्झौता र प्रतिबद्धता पालन गर्नु राज्यको दायित्व भएको स्मरण पनि गराएका छन् ।

‘राज्यका जिम्मेवार ओहदामा बसेकाहरूले शिक्षकहरूलाई आदेश, उपदेश वा सडकको धुलो नखाऊ भनेर होइन,’ उनले भनेका छन्, ‘उनीहरूसँगको तीन–तीन पटकसम्म गरेको सम्झौता र प्रतिबद्धता पालन गर्नु राज्यको दायित्व हो ।’