काठमाडौं – राजेश हमालको कम ब्याक फिल्म ‘नरसिंहा : अभतार’ पूर्वनिर्धारित मितिमा प्रदर्शनमा नआउने भएको हो । यो फिल्मको प्रदर्शन मिति चैत २९ गतेलाई तोकिएको थियो ।

दिवाकार भट्टराई निर्देशित यस फिल्म नायक राजेश हमालकै कारण पूर्वनिर्धारित मितिमा प्रदर्शनमा नहुने भएको हो ।

‘कर्मा’ र ‘पीताम्बर’को प्रदर्शन मिति चैत २९ लाई तोकिएको छ । यी दुवै फिल्म उक्त मितिमा प्रदर्शनमा आउने निश्चित छ ।

‘नरसिंहा : अभतार’ टीमले ‘कर्मा’ र ‘पीताम्बर’पछि प्रदर्शन मिति तय गरेको हो । कर्मा टीमले मंसिर र ‘पिताम्बर’ टीमले पुस ५ गते प्रदर्शन मिति तोकेका थिए ।

‘नरसिंहा : अभतार’ टीमले भने पुस ११ गते प्रदर्शन मिति घोषणा गरेको थियो । पीताम्बरमा अहिलेका चल्तीका स्टार नायक प्रदीप र कर्मामा नायक विपीन कार्की केन्द्रीय भूमिकामा छन् ।

जुनियर नायकहरूको फिल्मसँग हलमा प्रतिस्पर्धाबाट गलत सन्देश जाने भन्दै राजेशले उक्त मितिमा ‘नरसिंहा : अभतार’ प्रदर्शन नगर्न निर्माण पक्षलाई दबाब दिएको बुझिएको छ ।

स्रोत भन्छ, ‘राजेश दाइले हामीले नै ढिला प्रदर्शन मिति तोकेको हो । हामी नै हट्दा उचित हुन्छ भनेर निर्माण टीमलाई भन्नुभएको छ ।’

यसका साथै राजेशले एकल प्रदर्शनका लागि उपयुक्त मिति खोज्न समेत निर्माण पक्षलाई सल्लाह दिएको बुझिएको छ ।

राजेशको भनाइलाई निर्माण टीमले आपत्तिको रुपमा नलिएको बुझिएको छ । ‘नरसिंहा : अभतार’ टीम फिल्मको प्रदर्शन मिति आगामी जेठ ९ तोक्ने तयारीमा रहेको छ ।अर्थात् यो वर्ष फिल्म प्रदर्शनमा नआउने निश्चित भएको छ ।

यस फिल्ममा राजेशसहित नायिका नीति शाह र नायक सरोज खनाल मुख्य भूमिकामा रहेका छन् ।