काठमाडौं– हङकङका सञ्चार उद्यमी एवम् लोकतन्त्रवादी अभियन्ता जिम्मी लाई विदेशी शक्तिसँग साँठगाँठ गरेको अभियोगमा दोषी ठहर भएका छन् । उनलाई चिनियाँ राष्ट्रिय सुरक्षा कानुनअन्तर्गत दोषी ठहर गरिएको हो ।

७८ वर्षीय बेलायती नागरिक जिम्मी सन् २०२० को डिसेम्बर महिनादेखि जेलमा छन् । यस अभियोगमा उनलाई आजीवन कारावास हुनसक्छ ।

उनलाई सजाय भने अर्को वर्ष सुनाइने अपेक्षा गरिएको छ । जिम्मीले हाल सञ्चालनमा नरहेको एप्पल दैनिक अखबारको प्रयोग गरी विदेशी शक्तिसँग साँठगाँठ गरेको अदालतको ठहर छ ।

बीबीसीका अनुसार उनले चीन र हङकङमाथि प्रतिबन्ध लगाउनका लागि विदेशी सरकारसँग अभियान सञ्चालन गरेको ठहर गरिएको छ । हङकङका प्रमुख कार्यकारी जोन लीले अदालतको आदेशको स्वागत गर्दै जिम्मीका गतिविधिले हङकङका नागरिकको कल्याण र राष्ट्रिय हितमा हानि पुर्‍याएको टिप्पणी गरेका छन् ।

जिम्मीले आफूमाथि लगाइएका सबै आरोप अस्वीकार गर्दै आएका छन् । अधिकारवादी संस्थाहरुले भने यसलाई न्यायिक नाटकको संज्ञा दिएका छन् ।

विशेषगरी चीनले लागू गरेको राष्ट्रिय सुरक्षा कानुन नै विवादमा मुछिने गरेको छ । आफ्नो आलोचना दबाउनका लागि चीनले यो कानुन लागू गरेको विश्लेषण गरिएको छ ।