काठमाडौं- पाकिस्तानमा पोलियो रोगविरुद्ध खोप अभियान सञ्चालनमा आएको छ । पाकिस्तानका स्वास्थ्यमन्त्री मुस्तफा केमालले मुलुकका ४ करोड ५० लाख बालबालिकालाई पोलियो खोप दिइने अभियानको शुभारम्भ गरेका हुन् ।

उनले यस वर्ष अघिल्लो वर्ष सन् २०२४ को तुलनामा पाकिस्तानमा पोलियो रोगका बिरामीको सङ्ख्या घटेको भन्दै सन्तोष व्यक्त गरेका छन् ।

अघिल्लो वर्ष पाकिस्तानमा ७४ जनामा पोलियो रोगको सङ्क्रमण फेला परेको थियो । यस वर्ष भने पोलियो रोगीको सङ्ख्या ३० मा सीमित छ ।

यस वर्ष सबैभन्दा धेरै खैबर पख्तुनख्वा प्रान्तमा पोलियोका बिरामी भेटिएका छन् । यस प्रान्तमा १९ जनामा पोलियो भेटिएको छ ।

पोलियोविरुद्धको खोप अभियान सञ्चालनमा आएपनि विभिन्न कारणले पोलियो उन्मूलन हुन सकेको छैन । संरचनागत खराबी, खोप लगाउन आनाकानी, पोलियो खोपकर्मीमाथि आक्रमण, दुष्प्रचारजस्ता कारणले पाकिस्तानमा पोलियो उन्मूलन हुन नसकेको डन अखबारले जनाएको छ ।