काठमाडौं – भारतका विदेशमन्त्री डा.एस जयशंकर र चीनका पोलिट ब्युरो सदस्य तथा विदेशमन्त्री वाङ यीबी नयाँ दिल्ली भेटवार्ता भएको छ । जयशंकरले सोमबार साँझ फेसबुक पोष्टमार्फत उनीसँग भेटवार्ता भएको जानकारी दिएका हुन् ।

भेटवार्तामा दुई देशबीचको सम्बन्धबारे व्यापक छलफल भएको उनले जानकारी दिए । जयशंकरले भारत–चीन सम्बन्धलाई आपसी सम्मान, संवेदनशीलता र हितका आधारमा अघि बढाउनु उपयुक्त हुने धारणा राखेका छन्। उनका अनुसार हालका चुनौतीपूर्ण अवस्थाबाट अगाडि बढ्न दुवै पक्षले स्पष्ट र निर्माणात्मक दृष्टिकोण अपनाउनु जरुरी छ।

वार्तामा द्विपक्षीय व्यापार र आर्थिक मुद्दा, धार्मिक तीर्थयात्रा, जनस्तरबीचको सम्पर्क, नदीसम्बन्धी तथ्याङ्क आदानप्रदान, सीमावर्ती व्यापार, भौतिक पूर्वाधारमा जोड दिने संयोजन तथा अन्य द्विपक्षीय आदानप्रदानबारे गहन छलफल भएको उनले बताएका छन्।

त्यसका अतिरिक्त, दुवै नेताबीच क्षेत्रीय तथा अन्तर्राष्ट्रिय विषयमा पनि विचारविमर्श भएको उल्लेख गरिएको छ।जयशंकरले आजका छलफलले भारत–चीनबीच स्थिर, सहयोगी र भविष्यमुखी सम्बन्ध निर्माणमा योगदान पुग्ने विश्वास व्यक्त गरेका छन्।