काठमाडौं – फिल्म ‘परालको आगो’ वर्कसपको चरणमा प्रवेश गरेको छ । भदौ २६ गतेदेखि छायाङ्कन सुरु गर्ने योजनासहित कलाकारहरुलाई आइतबारदेखि वर्कसपमा बोलाइएको हो ।

वर्कसपमा फिल्मका शीर्ष कलाकार सौगात मल्ल, प्रकाश सपुत र सुहाना थापासहित अन्य कलाकारहरु सहभागी भएका छन् ।

कलाकार जितु नेपाल ‘मुन्द्रे’को बहिर्गमनपछि उनको स्थानमा भित्रिएका सौगात मल्ल नियमित वर्कसपमा उपस्थित भइरहेका छन् ।

यस फिल्मको निर्देशक लक्ष्मण सुनार हुन् । यो फिल्मको छायाङ्कन म्याग्दीको रमणीय स्थानमा हुने उनले बताए । यसको निर्माता सुशील पोखरेल हुन् ।

यो फिल्म साहित्यकार गुरुप्रसाद मैनालीको कथा ‘परालको आगो’ मा आधारित रहेर बन्न लागेको हो । फिल्मको लेखक भने सुशील देवकोटा हुन् ।

‘परालको आगो’ कथालाई ४५ वर्षअघि निर्देशक प्रताप सुब्बाले पनि फिल्म बनाएका थिए ।