काठमाडौं– अघिल्लो आर्थिक वर्षको तुलनामा सरकारले राजस्व आम्दानी बढाउँदा प्रत्यक्ष कर भन्दा अप्रतक्ष्य करको हिस्सा बढ्दै गएको देखिएको छ । साथै, प्रत्यक्ष करको हिस्सा अप्रत्यक्ष करको तुलनामा वृद्धिसमेत नभएको अर्थ मन्त्रालयको तथ्याङ्कले देखाएको हो ।
गत आर्थिक वर्ष (आव) ०८१/८२ मा सरकारले आयकर बापत दुई खर्ब ९७ अर्ब ८१ करोड ३३ लाख रुपैयाँ आम्दानी गरेको छ । जुन आम्दानी अघिल्लो आ.व.को तुलनामा ५.०६ प्रतिशतले बढी हो । अघिल्लो आ.व.मा सरकारले दुई खर्ब ८३ अर्ब ४६ करोड ४६ लाख रुपैयाँ आम्दानी गरेको थियो ।
आयकरअन्तर्गत पनि सरकारले गत आ.व.मा आयकर शीर्षकमा दुई खर्ब ६७ अर्ब ६० करोड १५ लाख रुपैयाँ राजस्व आम्दानी गरेको थियो जुन अघिल्लो आ.व.को तुलनामा ८.५० प्रतिशतले धेरै हो ।
त्यस्तै, आयकर शीर्षकअन्तर्गत नै ब्याजकर मार्फत् सरकारले गत आ.व.मा ३० अर्ब २१ करोड १८ लाख रुपैयाँ आम्दानी गरेको थियो । जुन आम्दानी अघिल्लो आ.व.को तुलनामा १७.९९ प्रतिशतले धेरै हो ।
तर, सरकारले गत आर्थिक वर्षमा अप्रत्यक्ष रूपमा लाग्ने भन्सार, अन्तःशुल्क र मूल्य अभिवृद्धि करको शीर्षकमा गर्ने आम्दानी भने अघिल्लो आर्थिक वर्षको तुलनामा वृद्धि गरेको छ ।
गत आर्थिक वर्षमा सरकारले भन्सार विभागमार्फत् चार खर्ब ७२ अर्ब ४१ करोड १० लाख रुपैयाँ राजस्व आम्दानी गरेको छ । जुन आम्दानी अघिल्लो आर्थिक वर्ष ०८०/८१ को तुलनामा १२.८८ प्रतिशतले बढी हो ।
अघिल्लो आवमा सरकारले भन्सार विभागमार्फत् चार खर्ब १८ अर्ब ५१ करोड ६२ लाख रुपैयाँ राजस्व आम्दानी गरेको थियो ।
सरकारले भन्सार विभागमार्फत् भन्सार महशुल, पैठारी, निकासी, पूर्वाधार कर, भन्सारको अन्य आय, कृषि सुधार शुल्क, सडक मर्मत तथा सुधार दस्तुर र सडक निर्माण तथा सम्भार दस्तुर शीर्षकमा राजस्व सङ्कलन गर्ने गर्छ ।
सरकारले अप्रत्यक्ष आम्दानीअन्तर्गत नै मूल्य अभिवृद्धि कर आम्दानी गत आवमा १०.१४ प्रतिशतले वृद्धि गरेको छ । गत आवमा सरकारले यस्तो आम्दानी तीन खर्ब ४१ अर्ब ९३ करोड २५ लाख रुपैयाँ आम्दानी गर्यो ।
साथै, गत आवमा सरकारले अन्तःशुल्कमार्फत् हुने आम्दानी पनि १९.६९ प्रतिशतले वृद्धि गरेको छ । गत आ.व.मा सरकारले अन्तःशुल्कमार्फत् एक खर्ब ७५ अर्ब १६ करोड ४७ लाख रुपैयाँ आम्दानी गरेको थियो ।
अघिल्लो आ.व.मा सरकारले यस्तो आम्दानी एक खर्ब ४६ अर्ब ३५ करोड २२ लाख रुपैयाँ गरेको थियो ।
प्रतिशतका हिसाबले निकासी कर आय सबैभन्दा धेरै
सरकारले गत आ.व.मा प्रतिशतका हिसाबले निकासीबाट हुने राजस्व आम्दानी सबैभन्दा धेरै गर्न सफल भएको देखिएको छ । गत आ.व.मा सरकारले निकासीबाट ८३ करोड १० रुपैयाँ राजस्व आम्दानी गरेको छ ।
जुन अघिल्लो आवको तुलनामा १८४.९२ प्रतिशतले धेरै हो । अघिल्लो आ.व.मा सरकारले निकासीमार्फत् २९ करोड १७ लाख रुपैयाँ राजस्व आम्दानी गरेको थियो ।
गत आव ०८१/८२ मा सरकारले १२ खर्ब ८४ अर्ब २० करोड ९६ लाख राजस्व आम्दानी गर्ने लक्ष्य राखेको थियो तर, ११ खर्ब ७८ अर्ब ८२ करोड मात्रै आम्दानी भयो । जुन आम्दानी अघिल्लो आर्थिक वर्ष ०८०/८१ को तुलनामा भने ११.३३ प्रतिशतले बढी हो ।
प्रतिक्रिया