काठमाडौं– एभरेष्ट बैंक लिमिटेड र चिनो हाइड्रोपावर लिमिटेडबीच चिनो खोलामा ७.८३ मेगावाट क्षमताको जलविद्युत आयोजना निर्माण गर्न १३६ करोड रुपैयाँ वित्तीय व्यवस्थापन गर्न सहमति भएको छ । 

उक्त सहमतिपत्रमा बैंकका तर्फबाट कार्यकारी प्रमुख सुदेश खालिङ र हाईड्रो पावरका तर्फबाट अध्यक्ष बिजय बहादुर श्रेष्ठद्वारा हस्ताक्षर गरिएको छ ।

मनाङको नासोङ गाउँपालिकामा अवस्थित उक्त परियोजना बुटवल पावर कम्पनी लिमिटडद्वारा प्रवर्द्धित परियोजना हो । यस परियोजना दुई वर्षमा सम्पन्न गर्न चाइनिज ठेकेदारलाई ईपीसी मोडलमा ठेक्का लगाइएको छ र यसबाट उत्पादित विद्युत् मनाङको धारापानीस्थित सब स्टेशनबाट राष्ट्रिय गीडमा जोडिने छ । 

यस परियोजनाको लागि नेपाल विद्युत् प्राधिकरण र चिनो हाईड्रोपावर लिमिटेडबीच विद्युत् खरिद बिक्रि सम्झौता गत वैशाखमा सम्पन्न भइसकेको छ । यस परियोजनाबाट वार्षिक ४४.४६२ गिगावाट आवर विद्युत् उत्पादन हुनेछ ।