काठमाडौं- शिक्षा ऐन तत्काल जारी गर्नुपर्ने मागसहित १७ दिनदेखि काठमाडौंमा आन्दोलित शिक्षक महासंघका प्रतिनिधीहरू प्रधानमन्त्री केपी शर्मा ओलीसँग वार्ताका लागि बालुवाटारमा पुगेका छन् ।

प्रधानमन्त्री ओलीले शुक्रबार साँझ शिक्षक महासंघका प्रतिनिधिहरूलाई वार्ताका लागि बालुवाटारमा बोलाएका थिए ।

चितवनको कार्यक्रम सकेर प्रधानमन्त्री भर्खरै मात्र फर्किएका छन् । अब केहीबेरमा प्रधानमन्त्री र शिक्षक महासंघका प्रतिनिधिबीच वार्ता हुँदैछ ।

महासंघका महासचिव तुलबहादुर थापाले शुक्रबार बेलुकी ७ बजे प्रधानमन्त्री ओलीले छलफलका लागि बोलाएको जानकारी दिएका थिए । उनका अनुसार महासंघका प्रतिनिधिहरू छलफलका लागि बालुवाटार पुगिसकेका छन् ।

महासचिव थापाले शिक्षा ऐन जारी नहुँदासम्म शिक्षकहरूको आन्दोलन जारी रहने पनि बताएका छन् । ‘यो आन्दोलन शिक्षा ऐन जारी नहुन्जेलसम्म चलाइरहन्छौँ,’ महासचिव थापाले भने ।

शिक्षक महासंघको नेतृत्वमा गत चैत २० गतेबाट देशभरका शिक्षकहरू काठमाडौं उत्रिएर आन्दोलित छन् । उनीहरूले माइतीघर–नयाँ बानेश्वर सडकखण्डमा दिनुहँ प्रदर्शन गर्दा काठमाडौंको सवारी व्यवस्थापन अस्तव्यस्त हुने गरेको छ ।