काठमाडौं- नेपाली कांग्रेसका सांसद डा. चन्द्र भण्डारीले प्रतिरोधस्वरुप सरकारले भारतको ओडिशास्थित केआईआईटी विश्वविद्यालयका सबै नेपाली विद्यार्थी फर्काउन सक्नुपर्ने बताएका छन् ।

मंगलबार सामाजिक सञ्जालमा आफ्ना धारणा सार्वजनिक गर्दै ओडिशाको केआईआईटी विश्वविद्यालयमा रहेका करिब १५ सय नेपाली विद्यार्थीलाई चारवटा जहाज पठाएर फर्काउन सक्नुपर्ने बताएका हुन् ।

उनले सबे नेपाली विद्यार्थीलाई जहाज पठाएर फर्काएपछि मात्रै वार्ताको कुरा गर्नु उचित हुने बताएका छन् ।

‘सरकार ! चारवटा जहाज लिएर ओडिशाबाट विद्यार्थी लिएर आउन कसले रोकेको छ ?’, उनले भनेका छन्, ‘तब विश्वविद्यालयसँग कुरा हुन्छ ! तिमी छौ भन्ने परिचय देउन सरकार ।’

यसैबीच भारतको ओडिशा राज्य सरकारले त्यहाँको भुवनेश्वरस्थित केआईआईटी विश्वविद्यालय अध्ययनरत नेपाली विद्यार्थी प्रकृति लम्सालको मृत्यु र अन्य सात सय नेपालीमाथि भएको ज्यादतीबारे छानबिनका लागि उच्चस्तरीय समिति बनाएको छ ।

आइतबार अपरान्ह नेपाली विद्यार्थी प्रकृतिको रहस्यमय र शंकास्पद मृत्युपछि छानबिन माग गर्दै दबाब दिन उत्रिएका सात सय बढी नेपालीलाई कलेजको होस्टेलबाट ज्यादती र कुटपिटसहित निष्कासन प्रकरणमा राज्य सरकारले छानबिन समिति बनाएको हो ।

यसअघि सोमबार उक्त विश्वविद्यालयले प्रकृतिको मृत्यु प्रकण छानबिन मागसहित प्रदर्शनमा उत्रिएका नेपाली विद्यार्थीलाई कुटपिट गरेको थियो । सुरक्षागार्ड र बाहिरका मान्छे बोलाएर कुटपिटसहित ७ सय विद्यार्थीलाई जबरजस्ती विभिन्न रेल स्टेशनमा लगेर अलपत्र छाडिएको थियो ।