काठमाडौं– प्रशान्त क्षेत्रमा चीनले आफ्नो प्रभाव बढाइरहँदा फिलिपिन्स र अष्ट्रेलियाले संयुक्त सैन्य अभ्यास शुरु गरेका छन् । दुई मुलुकले दक्षिण चीन सागर नजिकै अभ्यास गरेका हुन् ।

अभ्यासमा ३ हजार ६ सयभन्दा धेरै सैनिक सहभागी रहेको डिफेन्स न्यूजले जनाएको छ । अभ्यासलाई ‘अलोन’ नाम दिइएको छ । फिलिपिनी भाषामा यसको अर्थ तरङ्ग हुन आउँछ ।

यस अभ्यासमा गाइडेड क्षेप्यास्त्रवाहक युद्धपोत, एफ/ए–१८ सुपरसोनिक लडाकु विमान, सी १३० विमान, ज्याभलिन ट्याङ्क प्रतिरोधी क्षेप्यास्त्र र विशेष हतियार प्रयोग गरिएको छ । यस अभ्यासमा जापान, अमेरिका, क्यानाडा, दक्षिण, कोरिया र इन्डोनेशियाका सैनिक अधिकारी पनि पर्यवेक्षकका रुपमा उपस्थित छन् ।

यस अभ्यास आगामी अगस्ट २९ सम्म सञ्चालन हुने छ । पछिल्लो समय दक्षिण चीन सागरमा तनाव बढिरहेका बेला फिलिपिन्स र अस्ट्रेलियाले सञ्चालन गरेको अभ्यासलाई निकै महत्वका साथ हेरिएको छ ।