काठमाडौं– इजरायलले ‘रणभूमि’ विस्तार गरिरहेको जोर्डनका नरेश अब्दुल्लाहले बताएका छन् । फ्रान्सको स्ट्रसबोरस्थित युरोपेली संसदलाई सम्बोधन गर्दै जोर्डनका हाशेमी नरेश अब्दुल्लाहले इजरायल र इरानबीच जारी द्वन्द्व अन्त्य गर्न पनि आग्रह गरे ।

उनले यस द्वन्द्वलाई विश्वव्यापी खतराका रुपमा व्याख्या पनि गरेका छन् । ‘इजरायलले इरानलाई समेत समेटेर आक्रमणलाई विस्तार गरिरहेको छ, यस रणभूमिको सीमा कहाँ सकिन्छ कसैलाई थाहा छैन, र यो हरेक ठाउँका जनताका लागि खतरा छ ।’ अब्दुल्लाहलाई उद्धृत गर्दै कतारी टेलिभिजन अल जजीराले जनाएको छ ।

उनले विश्वले निर्णायक रुपमा यसबारे कदम नचाले इजरायली अपराधको भागिदार हुनुपर्ने पनि उल्लेख गरे । जोर्डन इजरायलको पूर्वी छिमेकी मुलुक हो ।

यसको दक्षिणमा साउदी अरब, पूर्वमा इराक र उत्तरमा सिरिया छन् । मध्यपूर्वको प्रभावशाली मुलुक मानिने जोर्डनका राजाको यस्तो बयानलाई निकै चासोपूर्वक हेरिएको छ ।