काठमाडौं – टेलिसिरिलबाट चर्चित बनेका मरिचमान श्रेष्ठ ‘बल्छी धुर्बे’ले फिल्म निर्देशनमा हात हाल्ने भएका छन् । उनले आफ्नै लेखन र निर्देशनमा फिल्म ‘गोबर गणेश’ बनाउने भएका हुन् ।

केही समयपछि फिल्म निर्माणको औपचारिक घोषणा गरेर भदौ पहिलो साताबाट छायाङ्कनमा निस्कने तयारीमा उनी रहेका छन् ।

खबरहबसँग उनले भने, ‘नायिका चयनको काम बाँकी छ । सबै कलाकार फाइनल भएपछि पोस्टर निकालेर फिल्मबारे थप जानकारी दिनेछु ।’

फिल्म फागुन १ गते प्रदर्शनमा ल्याउने गरी छायाङ्कनमा निस्कन लागेको उनले बताए ।

यस फिल्ममा जोडिएका एक व्यक्तिअनुसार केही कलाकार भने फाइनल भइसकेका छन् ।

‘होस्टल ३’बाट फिल्ममा डेब्यू गरेका कलाकार पदम तामाङसँग बल्छीले सम्झौता गरिसेकेका छन् । ‘होस्टल ३’ प्रदर्शनमा आएपछि उनले साइन गरेको यो पहिलो फिल्म हो ।

त्यस्तै, केदार घिमिरे ‘माग्ने बूढा’की श्रीमती सीतादेवी तिमल्सिना यस फिल्ममा शीर्ष कलाकारका रुपमा अनुबन्ध भइसकेकी छन् ।

बल्छीको लेखन र निर्देशन रहेको सिरियल ‘हल्का रमाइलो’की शीर्ष कलाकार पुजन घिमिरे ‘पकु’ पनि यस फिल्ममा रहेनेछिन् ।

त्यस्तै, प्रकाश घिमिरे पनि फाइनल भइसकेका छन् । माओत्से गुरुङसँग कुरा सकारात्क रहे पनि सम्झौता भइनसेकेको बुझिएको छ ।