काठमाडौं– प्रधानमन्त्रीका मुख्य सल्लाहकार विष्णु रिमालले प्रमुख प्रतिपक्षी नेकपा माओवादीका अध्यक्ष पुष्पकमल दाहाल प्रचण्डमाथि व्यंग्य प्रहार गरेका छन् ।

नेकपा कांग्रेस र नेकपा एमालेसहितको सरकारलाई प्रचण्डले ‘षडयन्त्र’ भनेपछि रिमालले प्रहार गरेका हुन् ।

उनले प्रचण्ड कहिले एमाले छाडेर कांग्रेस त कहिले कांग्रेस छाडेर एमालेतिर मिल्ने चरित्रमाथि प्रश्न गरेका छन् ।

‘कांग्रेस–एमाले मिलेर बनाएको सरकारलाई ‘षड्यन्त्र’ भन्न सक्ने साहस त उहाँ (प्रचण्ड) कै विशेषता हो। हो नि, उहाँले २०७४ मा काँग्रेस छोडेर एमालेसँग मिल्नु ‘नैतिक’ थियो, नेकपाको दुईतिहाइ सरकार ढाल्नु ‘सैद्धान्तिक’, अनि पाँचदलीय गठबन्धनको काँध चढेर फेरि एमालेकै साथ पाउनु ‘सङ्गतिपूर्ण’,’ उनले भनेका छन, ‘फेरि त्यो अवधिमा तीन–तीन पटक सत्ता सङ्गी फेर्नु त मानौँ राजनीतिक योग साधना हो—जहाँ प्रचण्डजी ‘पारसमणि’ बनेर फलामलाई सुन बनाइरहेका हुन्छन्। ’