काठमाडौं – अमेरिकी अधिकारीले भुल बस एल साल्भाडोर लगिएका मेरिल्यान्डका बासिन्दा अब फिर्ता नहुने बताएका छन्।

ह्वाइट हाउसकी प्रेस सेक्रेटरी क्यारोलीन लेभिटले एल साल्भाडोरका किलमार अलम्रेगो गार्सिया एम एस-१३ ग्याङको सदस्य समेत रहेको आरोप लगाएकी छिन्।

२९ वर्षीय उनीमाथि घरेलु हिंसाको आरोप लाग्नुका साथै श्रीमतीलाई चक्कु देखाएको कारण मुद्दा दायरसमेत भएको जनाइएको छ।

मेरिल्यान्डका न्यायाधीशले गार्सियालाई अमेरिका फिर्ता बोलाउने आदेश दिए पनि ह्वाइट हाउस भ्रमणमै रहेका एल साल्भाडोरका राष्ट्रपति नायिब बुकेलेले उनलाई फिर्ता गर्ने अधिकार आफूलाई नभएको बताएका थिए।

लेभिटले केही गरी गार्सिया अमेरिका आए पनि तत्कालै डिपोर्ट गरिने बताएकी छिन्। यसैगरी गृह प्रशासनले सन् २०२१ मा उनकी श्रीमतीले दर्ता गरेको उजुरी बाहिर ल्याएको छ।

उनकी श्रीमती जेनिफर भास्क्यु सुअराले भने उनीहरूको पारिवारिक विषयमा मिलापत्र भइसकेको बताएकी छिन्। १५ मार्चमा डिपोर्ट हुनेअघि गार्सिया मेरिल्यान्डमा बसोबास गरी रहेका थिए।