पोखरा – तनहुँको बन्दीपुर गाउँपालिका–६ मा वडाध्यक्षको कुटपिटबाट वडासचिव गम्भीर घाइते भएका छन्। भुक्तानी विवादका क्रममा वडाध्यक्ष बलबहादुर गुरुङले वडा सचिव नवीन भुसाललाई कार्यालयमै कुटपिट गरेका हुन्।

बन्दीपुरका प्रमुख प्रशासकीय अधिकृत यादवराज आचार्यका अनुसार भलिबल प्रतियोगिताको भुक्तानी प्रक्रियामा विवाद हुँदा वडाध्यक्ष गुरुङले सचिव भुसाललाई कुटपिट गरेका हुन्। सचिवले आवश्यक कागजात अध्ययनपछि प्रक्रिया अघि बढाउने बताएपछि वडाध्यक्षले आक्रोशित हुँदै हातपात गरेको उनले जानकारी दिए।

‘सचिव भर्खरै मात्र आएका कारण उनले प्रमाण नदेखिएपछि शंका गर्नु स्वाभाविक थियो। तर, वडाध्यक्षले दबाब दिएर कार्यालयमै कुटपिट गरे’ प्रशासकीय अधिकृत आचार्यले भने।’

सोमबार बिहान १० बजे घटना भएको थियो। कुटपिटबाट गम्भीर घाइते सचिव भुसाललाई प्रारम्भिक उपचारपछि भरतपुर रिफर गरिएको छ। उनको गाला र घाँटीमा चोट लागेको छ।

घटनाबारे वडाध्यक्ष गुरुङसँग बुझ्ने प्रयास गर्दा उनले आफू प्रहरी कार्यालयमा रहेको भन्दै पछि मात्र प्रतिक्रिया दिने बताए। प्रमुख प्रशासकीय अधिकृत आचार्यले घटनाको अनुसन्धान अघि बढाइसकेको र कानुनी प्रक्रिया थालिएको जानकारी दिए।

वडाध्यक्ष गुरुङ नेकपा एमालेबाट निर्वाचित प्रतिनिधि हुन्।